Меваҳои шаҳдбори Ҳисор
Ҳисор, 27 апрел. (АМИТ «Ховар», Ҳотам Рабиев).- Имрӯзҳо боғпарварони боғи «15 солагии Истиклолият»-и ноҳияи Ҳисор барои рӯёнидани ҳосили фаровони гелос саъю кӯшиш доранд. Маҳсулоти боғи мазкур соли гузашта то дурдастарин кишварҳо, аз ҷумла то Ҷумхурии Мардумии Чин ва Федератсияи Русия содир шуд. Дар дохили ҷумҳурӣ ҳам меваҳои ин боғ харидори зиёд дорад. Умуман соли гузашта зиёда аз 55 тонна гелоси хушлаззати ин боғи зебо харидорони худро ёфта буд. Нахустин ниҳолҳои гелоси боғи «15 солагии Истиклолият» шаш сол пеш шинонида шуда буд. Боиси тазаккур аст, ки чанд ниҳоли аввали ин боғи зеборо дар рӯзҳои нахусти мавсими ниҳолшинонӣ президенти кишвар Эмомалӣ Раҳмон ва пирону деҳқонони асил шинонида буданд.