Бар асари ҳолатҳои фавқулодда 14 кас ҳалок гардид
Душанбе, 2 май. (АМИТ «Ховар», Лутфия Эшонқулова). – Бар асари боришоти шадид ва омадани сел моҳҳои гузашта дар шаҳру ноҳияҳои ҷумҳурӣ 4 нафар ҳалок гардид. Дар ин бора аз маркази матбуоти Кумитаи ҳолатҳои фавқулодда ва мудофиаи граждании Тоҷикистон ба АМИТ «Ховар» хабар доданд.Мувофиқи маълумоти манбаъ, аз оғози соли ҷорӣ бар асари омадани сел, фуромадани тарма ва афтидани санг дар ҷумҳурӣ 14 нафар ҳалок шудааст.Ҳамзамон Кумитаи ҳолатҳои фавқулодда ва мудофиаи гражданӣ хабари баъзе васоити ахбори оммаро дар мавриди бар асари обхезӣ дар як қатор ноҳияҳои минтақаи Кӯлоб ҳалок гардидани 4 нафар рад намуд. Тавре манбаъ изҳор дошт, шабонарӯзҳои гузашта бар асари омадани сел дар минтақаҳои гуногуни Тоҷикистон 65 хонавода осеб дидааст. Ғайр аз ин аз офати табиӣ 400 метр роҳи ноҳияи Спитамен ва бисёр сохтмонҳои ноҳияи Ваҳдат зарар дидаанд.Алҳол комиссияи махсус дар маҳалҳо зарари офати табииро арзёбӣ менамояд.