Ш. Орумбекзода: “Соли 2015 барои соҳаи фарҳанг соли бобарор ва хотирмон буд”

Декабрь 30, 2015 09:46

Душанбе, 30.12.15. (АМИТ «Ховар»). — Соли 2015 низ дар баробари дигар солҳо бо рӯйдоду воқеоти муҳим барои Тоҷикистон соли бобарор буд. Дар ин сол дар соҳаҳои гуногуни мамлакат пешрафту тағийроти назаррас ба мушоҳида расидаанд. Аз ҷумла, соҳаи фарҳанг низ дар соли 2015 ба пешравиҳои назаррас ноил гардид.
Шамсиддин Орумбекзода, вазири фарҳанги Ҷумҳурии Тоҷикистон вобаста ба рушди соҳаи фарҳанг иброз дошт, ки фазои фарҳангии соли 2015 на танҳо дар пойтахти кишвар, балки дар тамоми минтақаҳои Тоҷикистон ба хубӣ эҳсос мегардид, зеро дар ин сол дар мамлакат чорабиниҳои зиёд дар робита ба ҷашнҳои муҳими миллию таърихӣ бо мундариҷаи нав дар сатҳи баланд доир карда шудаанд. «Соли 2015 аз ҳар нигоҳ барои аҳли фарҳанги кишвари тозаистиқлоли мо, соли басо бобарору бо файз буд. Дар ин сол дар мамлакат чорабиниҳои зиёд дар робита бо ҷашнҳои муҳими миллию таърихӣ бо мундариҷаи нав дар сатҳи баланд доир шуданд, ки муҳимтарини онҳо 3000-солагии Ҳисори шодмон, Симпозиюми байналмилалии Мир Саиди Ҳамадонӣ, Пойтахти фарҳангии Иттиҳоди давлатҳои мустақил эълон гардидани шаҳри Кӯлоб дар соли 2015, таҷлили ҷашни Наврӯз дар вилояти Суғд, 70-солагии Ғалаба дар Ҷанги дуюми ҷаҳонӣ, намоишгоҳи панҷуми байналмилалии китоби Душанбе, гузоштани санги асоси Театри миллии тоҷик, фестивал-озмуни ҷумҳуриявии театрҳои касбӣ “Парасту 2015”, ба истифода дода шудани бинои қасрҳои фарҳанг, китобхонаи марказӣ ва осорхонаи таърихии кишваршиносӣ дар маркази ноҳияи Ҳисор, қасрҳои фарҳанг дар маркази ноҳияҳои Бобоҷон Ғафуров, Рӯшон ва Айнӣ, барномаҳои фарҳангӣ ба ифтихори чорабиниҳои сатҳи байналмилалӣ ва амсоли инҳо, ки аксаран бо иштироки Пешвои миллат Президенти Ҷумҳурии Тоҷикистон Эмомалӣ Раҳмон сурат гирифтанд, барои таҳкими сулҳу ваҳдат ва рушди минбаъдаи фарҳанги миллӣ, афзун намудани мавқеи байналхалқии фарҳанги миллии мо заминаҳои ҷиддӣ фароҳам овардаанд»,-афзуд вазири фарҳанги Ҷумҳурии Тоҷикистон.
Шамсиддин Орумбекзода ҳамчунин иттилоъ дод, ки соли 2015 барои аҳли фарҳанг соли бобарор буда, дар ҷараёни сол фестивалҳои ҷумҳуриявии Ҳафтаи кӯдакон ва наврасони Тоҷикистон ва Фестивали ҷумҳуриявии театрҳои халқӣ “Родмардони Ватан” баргузор гардид: «Бояд гуфт ки дар маҷмӯъ фазои фарҳангии соли 2015 на фақат дар пойтахти кишвар, балки дар тамоми манотиқи он хеле ғанӣ буд ва ман бовар дорам, ки тамоми мардум воқеан бо фароғати фарҳангӣ фаро гирифта шуданд”.
Бояд гуфт, ки дар фарҷоми соли 2015 воқеаи таърихӣ ва муҳими сиёсии мамлакат, ки аз тарафи тамоми мардуми кишвар хуш пазируфта шуд, ин қабул шудани Қонуни Ҷумҳурии Тоҷикистон дар бораи “Асосгузори сулҳу ваҳдати миллӣ-Пешвои миллат” мебошад. Ба гуфтаи Шамсиддин Орумбекзода, вазири фарҳанги Ҷумҳурии Тоҷикистон Сарвари давлат Эмомалӣ Раҳмон замоне ба сари қудрат омад, ки Тоҷикистон ба ҷанги таҳмилии дохилӣ гирифтор буда, кишварро хавфи нобудӣ таҳдид мекард ва мардум ба парокандагиву гуруснагӣ ва нодорӣ рӯ ба рӯ буданд. Номбурда гуфт, маҳз хизматҳои шоёни Пешвои миллат-Эмомалӣ Раҳмон буд, ки дар кишвари мо сулҳу субот, оромӣ ва ризоияти миллӣ барпо шуд. «Пешвои миллат ва асосгузори сулҳу ваҳдат эълон гардидани Президенти кишвар Эмомалӣ Раҳмонро месазад аз воқеаҳои муҳими таърихии даврон номид, ки ин барои пешбурди минбаъдаи сиёсати кишвари мо, ба ҳам овардани тамоми табақаҳои ҷомеа, таҳкими сулҳу ваҳдат ва ягонагӣ дар кишвар мусоидат мекунад ва мо умедворем, ки тамоми мардум онро хуш пазируфтанд ва Маҷлиси Олии Ҷумҳурии Тоҷикистон танҳо тарафи қонунии онро, ки дархост ва ниёзи тамоми мардуми тоҷик буд, амалӣ гардонд».
Фарҳанг ҳастии миллат ва соҳаи муҳим барои рушду пешрафти маънавиёт дар ҷомеа ба шумор меравад. Аҳли фарҳанги Тоҷикистон низ бо дастовардҳои муҳими соли 2015 ният доранд соли нави мелодиро бо мақсади амалӣ кардани нақшаҳои наву созанда истиқбол гиранд ва барои ноил шудан ба комёбиҳои тоза талош намоянд.

Декабрь 30, 2015 09:46

Хабарҳои дигари ин бахш

Дар Тоҷикистон Рӯзҳои фарҳанги Туркманистон баргузор мегарданд
ЭЪЛОН: «ВАССОФИ ВАТАН». Барои рӯзноманигорон ва корбарони саҳифаҳои иҷтимоии шабакаҳои интернетӣ фестивал-озмун баргузор мешавад
Тандиси биринҷии чеҳраи Президенти Тоҷикистон ба Осорхонаи миллӣ супорида шуд
АЗ НАВРӮЗ ТО НАВРӮЗ. Дар Донишкадаи давлатии санъати тасвирӣ ва дизайни Тоҷикистон фестивали муд баргузор мегардад
ИМРӮЗ-РӮЗИ ҶАҲОНИИ ТЕАТР. Дар давраи соҳибистиқлолӣ дар Тоҷикистон барои пешрафти санъати касбии театрӣ шароити мусоид фароҳам оварда шуд
«САЙРИ ГУЛИ ЛОЛА». Дар Суғд Фестивали вилоятии гулҳо доир мешавад
КОНИ ЛАЗЗАТ ВА ХОНИ НЕЪМАТ. Хабарнигори АМИТ «Ховар» оид ба таомҳои наврӯзӣ дар Бадахшон маълумот ҷамъоварӣ намуд
НАВРӮЗ-МАҲБУБТАРИН ҶАШНИ МИЛЛИИ ТОҶИКОН. Суратгузориш аз таҷлили бошукуҳи ҷашни Наврӯз дар Академияи миллии илмҳои Тоҷикистон
Байни Китобхонаи миллии Тоҷикистон ва Китобхонаи оммавӣ, илмӣ-техникии шуъбаи Академияи илмҳои Русия дар минтақаи Сибир Созишномаи ҳамкорӣ ба имзо расид
Оши бурида дар Наврӯз ҳамчун рамзи умри дароз ва ҳаёти хушбахтона омода мешавад
НАВРӮЗ — ҶАШНИ ЭҲЁ. Ин ҷашни ҷаҳонӣ бунёди маънавии миллати тоҷик мебошад
МАЗМУНҲОИ НАВРӮЗӢ ДАР АШЪОРИ АҲДИ КЛАССИКИИ ФОРСУ ТОҶИК. Андешаҳои адабиётшинос дар хусус