Суди шаҳри Душанбе: Пайравони “ДОИШ” маҳкум гардиданд

Январь 14, 2016 13:13

Душанбе, 14.01.2016. (АМИТ “Ховар”). — Коллегияи судӣ оид ба парвандаҳои ҷиноятии Суди шаҳри Душанбе дар се моҳи соли 2015 се парвандаи ҷиноятиро аз рӯи шикоятҳои кассатсионии ҳимоятгарон баррасӣ кард. Маҳкумшудагон дар соли 2015 бо ҳар роҳу восита даст ба аъмоли хавфноку зишт зада, бо таблиғу ташвиқи маводи гурӯҳи ифротии ДОИШ машғул гардида, бо намояндаҳои он дар алоқа шуда, пайравони худро зиёд кардан мехостанд. Масалан, Р. Н.-ро (соли таваллудаш 1987, соҳиби се фарзанд) суди марҳилаи аввал барои он гунаҳкор донистааст, ки бо маслиҳати пешакӣ бо нафароне, ки ақидаҳои ифротии гурӯҳи террористии “Давлати Исломии Ироқу Шом”-ро ҷонибдорӣ менамуданд, ҳамроҳ шуда, худ низ ба ҷалби шаҳрвандони дигари кишвар машғул гашта, онҳоро барои иштирок дар муқовиматҳои мусаллаҳона ва амалиёти ҷангӣ дар Сурия даъват намудааст. Мавриди зикр аст, ки бародари номбурда дар Сурия қарор дошта, барои ҳарчи бештар ба дом афтондани шахрвандон бо ӯ робитаву ҳамкорӣ доштааст ва ҳатто як оиларо ба майдони ҷанг сафарбар намудааст. Барои омода намудани шиносномаи хориҷӣ ва роҳкиро ба онҳо ёрӣ расонда, тавассути роҳи Душанбе-Ҷиргатол-Ӯш-Туркия-Сурия онҳоро фиристодааст. Он оила алҳол дар Сурия қарор дорад. Шикояти кассатсионии ҳимоятгари ин маҳкумщуда аз ҷониби Суди шаҳри Душанбе бетағйир мононда шуд. Номбурда тибқи талаботи моддаи 401 эзоҳи 1 Кодекси ҷиноӣ бо назардошти тамоми ҳолатҳои хусусияту дараҷаи хавфнокии ҷинояти содиршуда ба муҳлати 14 сол аз озодӣ маҳрум шудааст.
Кирдори Х.И., соли таваллудаш 1990 низ хеле пасту нангин аст. Ӯ дар сомонаҳои “Одноклассники” видеороликҳои мазмуни динидошта ва баромадҳои “Гурӯҳи 24″-ро, ки хусусияти ифротию зиддидавлатӣ доштанд, тамошо намуда, дар фиттахо сабт карда, ба онхо номҳои “Клипҳои исломӣ №3“ ва “Сурудҳои исломӣ №4” ном монда, онҳоро мефурӯхтааст, ки баъди огаҳӣ ёфтан аз мазмуни ин наворҳо ин нафарон фиттаҳоро ба мақомоти қудратӣ бурда супурдаанд. Х.И. кирдорҳои ҷиноятии худро идома дода, 94 адад чунин фиттаҳои зидди сохти конститусионӣ ва ифротиро бо нархи 1 сомониву 20 дирам ба соҳиби яке аз дӯконҳои фиттафурӯшй фурӯхтааст, ки ӯ низ аз мазмуни он бехабар онҳоро бо нархи 3 сомонӣ ба муштариён фурӯхтааст. Боқимонда 26 фиттаро аз дӯкони ӯ ёфта, мусодира намудаанд. Суди марҳилаи якум Х.И.-ро бо моддаи 307, қисми 2, банди “а” Кодекси ҷиноятии Ҷумҳурии Тоҷикистон гунаҳкор дониста, ба муҳлати 10 сол аз озодӣ маҳрум ва ҷазо дар муассисаи низомаш сахт таъйин кардааст. Шикояти кассатсионии ҳимоятгар аз ҷониби Суди шаҳри Душанбе Душанбе бетағйир мононда шуд.
Маҳкумшудаи дигар Ф.М. хеле ҷавон, соли таваллудаш 1996 аст, зери таъсири наворҳои сомонаи “Одноклассники” дар бораи гурӯҳи ифротии “ДОИШ”, ки аз ҷониби Суди Олии Тоҷикистон гурӯҳи экстремистӣ эълон шудааст, маълумот пайдо намуда, тавассу¬ти телефони мобилӣ ба сомонаи “Вайбер” пайваст шуда, ба дӯстонаш наворҳои ифротии гурӯҳи мазкурро интиқол намудааст. Номбурда хамчунин дар ин сомона бо Б.Ч., робита намуда, барои дар задухурдҳои Сурия ширкат намудан маслиҳат кардааст. Суди ноҳияи Исмоили Сомонӣ Ф. М.-ро бо моддаи 307 қисми 3-и Кодекси ҷиноӣ ба муҳлати 3 сол, Б.Ч.,-ро бо қисми 2-и ҳамин модда ба муҳлати се сол аз озодӣ маҳрум намудааст.
Имрӯз ҳар шаҳрванд ва ҳар инсоне, ки бо чунин афрод дучор меояд, бояд бетарафӣ зоҳир накунад, зеро ин ҷавонон худ гумроҳу бе ақидаи солиманду боз чандин нафарони дигарро аз пайи худ мебаранд. Онҳо ба амнияту оромии Ватан хатар доранд. Пешгирии онҳо аз ин аъмоли зишт аз ҷониби ҳамватанон саҳм гузоштан дар суботу оромии дохилу хориҷи кишвар аст.
Имрӯз ҳар волидайн бояд бидонад ки рафтору кирдори фарзандон назорати ҷиддӣ мехоҳад. Махсусан огоҳӣ ёфтан аз дӯстону ҳамсуҳбатони онҳо дар шабакаҳои интернетӣ ва кӯча зери назари ҷиддии волидайн бояд бошад. Бепарвоӣ дар вазъи кунунӣ натиҷаҳои баду фоҷиабор дорад.

Январь 14, 2016 13:13

Хабарҳои дигари ин бахш

Ҷавонон бояд қарзи шаҳрвандӣ — таҳсили илму дониш ва саҳмгузорӣ дар пешрафти Ватанро софдилона иҷро намоянд
Тоҷикистон дар мубориза бо қочоқ ва муомилоти ғайриқонунии маводи нашъаовар нақши калидӣ дорад
Ҳайати Тоҷикистон дар чорабиниҳои канорӣ дар доираи иҷлосияи 67-уми Комиссияи Созмони Милали Муттаҳид оид ба воситаҳои нашъадор иштирок намуд
Дар Вена ҳамкории Тоҷикистон бо Чин ва Эрон дар мубориза бо муомилоти ғайриқонунии маводи нашъадор баррасӣ шуд
Ҷаласаи гурӯҳҳои кории ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон баргузор гардид
Ҳайати Тоҷикистон дар чорабинии канории Қазоқистон дар Вена иштирок намуд
Дар Вена оид ба сиёсати зиддимухаддиротии Ҷумҳурии Тоҷикистон маълумот дода шуд
Мулоқоти ҳамраисони ҳайатҳои ҳукуматии Тоҷикистон ва Қирғизистон оид ба делимитатсия ва демаркатсияи сарҳади давлатӣ доир гардид
Тарбияи ватандӯстӣ — омили муттаҳидии миллат дар мубориза бар зидди ифротгароӣ ва хурофотпарастӣ
Ҳайати Тоҷикистон дар иҷлосияи 67-уми Комиссияи Созмони Милали Муттаҳид оид ба воситаҳои нашъадор дар Вена иштирок дорад
14 МАРТ-ИДИ КАСБИИ КОРМАНДОНИ ПРОКУРАТУРА. Давоми 32 сол фаъолияти ин ниҳоди давлатӣ ба таври назаррас тақвият ёфт
Эмомалӣ Раҳмон: «Хурофот хатарест, ки ба имрӯзу ояндаи Тоҷикистон ва минтақа таҳдиди ҷиддӣ дорад»