Пешвои миллат: “Солимии ҷомеа-сарвати давлат аст”
Душанбе, 04.03.2016. (АМИТ «Ховар»). – Ин нуктаро Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни ифтитоҳи маҷмааи нави тандурустии «Истиқлол» изҳор дошт.
Маврид ба зикр аст, ки бунёд ва мавриди истифода қарор гирифтани ин маркази замонавӣ барои беҳтар кардани сатҳу сифати хизматрасонии тиббӣ ва дастрасии шаҳрвандон ба он шароити мусоид фароҳам меорад.
Ба масъулин дастур дода шуд, ки барои дастгоҳҳои навтарин мутахассисони сатҳи ҷаҳонӣ омода созанд.
Ба таъкиди Сарвари давлат, саломатии аҳли ҷомеа дар мадди аввали давлату Ҳукумати мамлакат қарор дорад. Бо назардошти ин, Президенти кишвар Эмомалӣ Раҳмон барои истифодаи технологияи пешрафтаи ташхисию табобатии муосир ба масъулин дастурҳои мушаххас дод.
Тазаккур додан ба маврид аст, ки маҷмааи тандурустии «Истиқлол» нахустин муассисаи бисёрсоҳаи тиббии кишвар мебошад, ки мутобиқ ба талаботи меъёрҳои байналмилалӣ бунёд гардида, фарогири зинаҳои ташхис, табобат, аз ҷумла хадамоти ёрии фаврии тиббӣ ва офиятбахшии тиббии муосир мебошад.