Ифтитоҳи ду хатсайри нав аз Душанбе ба Кобул ва Лоҳур

Душанбе, 14.04.2016. /АМИТ «Ховар»/. Ширкати ҳавопаймоии «Сомон Эйр» ифтитоҳи ду хатсайри навро дар самти Душанбе-Кобул (Афғонистон) ва Душанбе-Лоҳур (Покистон) эълон мекунад. Ширкати ҳавопаймоии «Сомон Эйр» ба пойтахти Афғонистон ҳафтае як маротиба — рўзи ҷумъа парвоз хоҳад кард. Хатсайри аввалин ба ин самт 29 апрел ба роҳ монда мешавад.
Парвозҳо ба Лоҳур ҳафтае ду маротиба- рўзҳои душанбе ва ҷумъа амалӣ хоҳанд гашт. Илова бар ин, ширкати ҳавопаймоии «Сомон Эйр» тасмим гирифтааст, ки дар самти Душанбе-Теҳрон-Душанбе парвозҳоро ба роҳ монад.
Тамоми парвозҳо дар ҳавопаймоҳои бароҳати «Боинг 737» амалӣ хоҳанд гашт.
Тавре ки аз хадамоти матбуотии ширкат иттилоъ доданд, «Сомон Эйр» парвозҳоро аз Тоҷикистон ба Олмон, АМА, Туркия, Чин, Русия ва Қазоқистон муваффақона иҷро мекунад.