Вазоратҳои корҳои хориҷии Тоҷикистону Таиланд нақшаи машваратҳои дуҷонибаро мувофиқа карданд
Душанбе, 25.08.2016 /АМИТ «Ховар»/. 23 августи соли 2016 бо ҳайати Шоҳигарии Таиланд таҳти роҳбарии муовини мудири кулли Раёсати Осиёи Ҷанубӣ, Ховари Миёна ва Африқои Вазорати корҳои хориҷии ин кишвар хонум Пенпрапа Вонгковит мулоқоти корӣ баргузор шуд.
Дар ҷараёни суҳбат масъалаҳои тавсеаи робитаҳои дуҷониба дар соҳаҳои сиёсӣ, тиҷоратию иқтисодӣ, обу энергетика, кишоварзӣ, саноат, илму маориф ва фарҳангию башарӣ баррасӣ шуданд. Алоқамандии мутақобил ҷиҳати таҳкими пояи шартномавию ҳуқуқии ҳамкорӣ ва таҳияи созишномаҳои дуҷониба дар соҳаҳои мазкур изҳор гардид. Дар ин замина нақша ва рӯзномаи машваратҳои дарпешистодаи байни вазоратҳои корҳои хориҷии ду кишвар мувофиқа шуданд.
Ҳамчунин атрофи ҳамкории Тоҷикистону Таиланд дар чорчӯби созмонҳои байналмилалию минтақавӣ, аз чумла СММ, Созмони Ҳамкории Исломӣ ва Муҳовара оид ба ҳамкорӣ дар Осиё табодули назар сурат гирифт.