Баррасии тамоюли асосии рушди ҷараёни муҳоҷирати меҳнатӣ дар бозори дохилию берунии ҷумҳурӣ
Душанбе, 28.10.2016 /АМИТ «Ховар»/. Конфронси ҷумҳуриявии илмӣ- амалии «Масоили иҷтимоию меҳнатии такрористеҳсолкунии сармояи инсонӣ дар системаи иқтисодиёти миллии Тоҷикистон дар давраи Истиқлолият» имрӯз дар шаҳри Душанбе ба кори худ оғоз кард. Дар ин бора ба АМИТ «Ховар» аз Муассисаи давлатии «Пажӯҳишгоҳи меҳнат, муҳоҷират ва шуғли аҳолӣ» хабар доданд.
Дар ҳамоиши илмиву амалӣ масъалаҳои навкунии механизмҳои инноватсионии болоравии иқтисодиёт, тағйирёбии парадигмаҳои рушди сармояи инсонии ҷумҳурӣ, бозори сармояи инсонӣ ва проблемаҳои иҷтимоию иқтисодии ташаккули он, фаъолнокии қатъии такрористеҳсолкунии сармояи инсонӣ, рушди шароити иҷтимоӣ ва истифодаи институтҳои иҷтимоӣ барои ташкили уҳдабароёнаи шаклҳои шуғл, механизми ташкилию иқтисодии тайёр кардани кадрҳои коргарии рақобатпазир дар давраи муосир, самтҳои асосии рушди соҳибкорӣ, ташкили ҷойҳои корӣ ва тамоюли асосии рушди ҷараёни муҳоҷирати меҳнатӣ дар бозори дохилию берунии ҷумҳурӣ баррасӣ мегарданд.
Дар конфронси дурӯза ҷиҳати ҳалли масъалаҳои нисбатан ҷории иҷтимоию меҳнатии такрористеҳсолкунии сармояи инсонӣ дар низоми иқтисодиёти миллии Тоҷикистон дар шароити рушди устувори иқтисодӣ тавсияҳои илмии асоснок таҳия мегарданд.
Дар кори конфронс олимону коршиносони соҳаи иқтисоди ҷумҳурӣ, равоншиносон, мутахассисон, намояндагони вазорату идораҳои гуногун, ташкилотҳои байналмилалӣ ва ғайридавлатӣ, ки ба масъалаҳои иҷтимоию меҳнатӣ ва такрористеҳсолкунии сармояи инсонӣ дар низоми иқтисодиёти миллӣ машғул мебошанд, ширкат доранд.