Дар шаҳри Ваҳдат озмуни «Ҳамнишине беҳ аз китоб махоҳ» баргузор гардид
Ваҳдат, 28.10.2016 /АМИТ «Ховар»/. Дирӯз дар Кохи маърифати шаҳри Ваҳдат бо иштироки аҳли адаб, нависандагону шоирон озмуни шаҳрии «Ҳамнишине беҳ аз китоб махоҳ» баргузор гардид. Дар озмуни мазкур хонандагони муассисаҳои таълимии шаҳр, ки аъзои китобхонаҳои шаҳр мебошанд, иштирок намуда, дар асоси шарти озмун асарҳои хондаи худро ба ҳайати ҳакамон муаррифӣ намуданд. Ғолибони озмун бо мукофот ва ифтихономаҳои шуъбаи фарҳанги шаҳр кадрдонӣ шуданд. Мақсади озмун аз тарғибу ташвиқи ҷавонон ба китобхонӣ, ғанигардонии ҷаҳони маънавии шаҳрвандон, махсусан насли наврас иборат буд.
Хонандаи синфи 11, гирандаи стипендияи президентӣ ва ёрдамчии (волонтёри) бахши ҷавонон, варзиш ва сайёҳии шаҳр Нилуфар Умарова иброз намуд, ки «бо забонҳои тоҷикӣ, фаронсавӣ, англисӣ ва русӣ зиёда аз 180 асар мутолиа намуда, айни замон китобхонаи хусусии худро ташкил намудааст, ки теъдоди китобҳои он ба 500 адад мерасад. Соли дуюм аст, ки иштирокчии фаъоли озмуни «Ҳамнишине беҳ аз китоб махоҳ» буда, сазовори ҷойҳои намунавӣ мегардам».