Кишоварзони шаҳри Ваҳдат имсол дар 27 гектар боғу токзор бунёд мекунанд

ВАҲДАТ, 31.01.2017. /АМИТ «Ховар»/. Бо иштироки масъулини Раёсати кишоварзии шаҳри Ваҳдат ҷиҳати фаҳмонидани муҳтавои Паёми Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо кишоварзону деҳқонони хоҷагиҳои деҳқонии шаҳр вохӯрӣ доир гардид. Дар асоси таъкидҳои Пешвои миллат, ки соҳаи боғу токпарварӣ бояд ба яке аз соҳаҳои сердаромадтарини ҷумҳурӣ табдил дода шавад, соли 2016 дар шаҳри Ваҳдат 46 гектар боғу токзори нав бунёд гардид. 7 гектар боғу токзор аз нав барқарор шуд, ки нисбат ба нақшаи тарҳрезигардида 39,8 гектар зиёд мебошад. Дар ин бора мудири шуъбаи Раёсати кишоварзии шаҳри Ваҳдат Эмомалӣ Ахмедов ба хабарнигори АМИТ «Ховар» иттилоъ дод.
Дар ҷамъомад кишоварзони шаҳр дар назди худ мақсад гузоштанд, ки баҳри таъмини нишондиҳандаҳои иқтисодиёти шаҳр ва зиёд намудани ҳаҷми умумии маҳсулоти кишоварзӣ, баланд бардоштани ҳосилнокии зироати кишоварзӣ дар хоҷагиҳои деҳқонӣ ва кооперативҳои истеҳсолӣ соли 2017 дар майдони 27 гектар боғу токзор бунёд менамоянд. Ҳамчунин дар 5809 гектар кишти зироати тирамоҳӣ ва дар 6640 гектар кишти зироати баҳорӣ гузаронида мешавад.