Қуръакашии бозиҳои ниҳоии Ҷоми ҷаҳон-2018 дар Кремл мегузарад

ДУШАНБЕ, 24.01.2017/АМИТ «Ховар»/. Қуръакашии бозиҳои ниҳоии Ҷоми ҷаҳон -2018 1-уми декабри соли 2017 дар Кремл мегузарад. Дар ин бора ноиби сарвазири Россия Виталий Мутко ба рӯзноманигорон хабар додааст. Ба гуфти ӯ, роҳбарияти ФИФА гузаронидани қуръакашии бозиҳои ниҳоии Ҷоми ҷаҳон 2018-ро, ки дар 11 шаҳри Россия соли оянда мегузарад, маъқул шуморидааст.
Омодагӣ ба ин чорабинии муҳим аз рӯи нақша идома дорад. Имсол аз 17 июн то 2 июл дар шаҳрҳои Қазон, Сочи, Санкт-Перербург ва Москва бозиҳои Ҷоми Конфедератсия гузаронида мешаванд. Соли оянда вақти гузаронидани бозиҳои ниҳоии Чемпионати ҷаҳон оид ба футбол аз 14 июн то 15 июл муқаррар шудааст.
«1 декабр гузаронидани қуръакашии бозиҳои ниҳоии Чемпионати ҷаҳон оид ба футболро дар Кремл ба ФИФА пешниҳод кардем. Ин даъват аз ҷониби онҳо пазируфта шуд», -овардааст суханони Муткоро ТАСС.