Дастаи «Спартак»-и шаҳри Ваҳдат Ҷоми Раиси шаҳрро соҳиб шуд

ВАҲДАТ, 02.02.2017. /АМИТ «Ховар»/. Дар варзишгоҳи «Андигон»-и ҷамоати деҳоти Абдулло Абдулвосиеви шаҳри Ваҳдат бозии финалии мусобиқаи кушоди шаҳрӣ оид ба футбол барои дарёфти «Ҷоми Раиси шаҳри Ваҳдат» дар доираи тадбирҳои Соли ҷавонон ва бахшида ба 20- солагии Рӯзи Ваҳдати миллӣ баргузор гардид. Дар мусобиқаи кушоди шаҳрӣ оид ба футбол барои дарёфти «Ҷоми Раиси шаҳри Ваҳдат» дастаҳои «Чуқайша-1» ҷойи аввал, «Карим Исмоилов» ҷойи дуюм, «Чуқайша» ва «Андигон» ҷойҳои сеюмро соҳиб гаштанд. Дар ин бора ба хабарнигори АМИТ «Ховар» масъулини бахши ҷавонони шаҳр иттилоъ доданд.
Намояндагони Федератсияи футболи Ҷумҳурии Тоҷикистон ба ғолибон дипломҳою ифтихорномаҳои Бахши ҷавонон, варзиш ва сайёҳии шаҳр ва ба дастаи овозадори «Спартак»-и шаҳри Ваҳдат, ки дар финал ҷойи аввалро ба даст овард, Ҷоми Раиси шаҳр ва ифтихорномаҳоро тақдим намуданд.
Дар мусобиқа қариб 4 ҳазор нафар ҷавонону мухлисони футбол аз тамоми ҷамоатҳои шаҳраку деҳот ва кӯчаву маҳаллаҳо иштирок намуданд.
Мустаҳкам намудани риштаи дӯстӣ, ташвиқу тарғиби футбол миёни аҳолӣ, муайян намудани дастаҳои мунтахаб ва ҷалби ҷавонон ба тарзи ҳаёти солим ҳадафи асосии мусобиқоти мазкур ба ҳисоб мерафт.