Худкардаро даво нест…

Февраль 15, 2017 17:28

ДУШАНБЕ, 15.02.2017 /АМИТ «Ховар»/. Новобаста аз он, ки мақомоти ҳифзи ҳуқуқи Тоҷикистон солҳои охир фаъолиятро оид ба ошкор намудани интиқолдиҳандагони маводи нашъаовар пурзӯр гардонида, садҳо парвандаҳои ҷиноӣ ба суд ирсол намуданд, вале шумораи одамоне, ки барои даромади муфт ҳаёти худро зери хатар мегузоранд, кам намешавад.
Таҷриба нишон медиҳад, ки ин ботлоқи ноустувор одамонро ба коми худ фурӯ мебарад.
Суди ноҳияи Исмоили Сомонии шаҳри Душанбе парвандаи ҷиноятиро нисбат ба Азизулло валади Зоҳир, соли тавалудаш 1980, шаҳрванди Ҷумҳурии Исломии Афғонистон бо айбдорӣ аз рӯи моддаи 36, қисми 5-200, қисми 4 банди «г, д» -и Кодекси ҷиноятии Ҷумҳурии Тоҷикистон баррасӣ намуд.
Номбурда барои робита ва ҳамкорӣ доштанаш бо гурӯҳи муташаккили ҷиноятии ба хариду фурӯши воситаҳои нашъадор ба миқдори махсусан калон машғулбуда гунаҳгор дониста мешавад.
Моҳи январи соли 2016 ба мақоми дахлдори кишвар маълумот дар хусуси бо роҳи қочоқ ба ҳудуди Ҷумҳурии Тоҷикистон гузарондан ва ба муомилоти ғайриқонунӣ баровардани воситаҳои нашъадори навъҳояшон гуногун аз ҷониби гурӯҳи муташаккили ҷиноятӣ бо роҳбариии Қадрулло валади Назирбой, шаҳрванди ҶИА ворид гардид.
Бо мақсади дастгир намудани ин гурӯҳи муташаккили ҷиноятӣ тибқи Қонуни Ҷумҳурии Тоҷикистон «Дар бораи фаъолияти оперативӣ-ҷустуҷӯӣ» шаҳрванд бо номи рамзии «Ш» ва кормандони мақомоти дахлдор ҳамчун миёнарав ва харидори шартии воситаи нашъадор амалиёт гузарониданд.
Тибқи маслиҳати пешакӣ аъзои гурўҳи муташаккил Қадрулло валади Назирбой ва дигар ҳаммаслакони ӯ бояд, ки хариду фурӯши воситаҳои нашъадорро бо шахсони ба чорабинии фаврӣ воридкардашуда дар ҳудуди минтақаи сарҳадии «Шоҳон» — и ноҳияи Шамсиддин Шоҳини вилояти Хатлон амалӣ менамуданд.
3 январи соли 2016 дар минтақаи зикршуда аз ҷониби харидорони шартӣ чорабинии фаврӣ гузаронида шуда, Қадрулло валади Назирбой ва ҳаммасалаконаш бо тахаллуси «Аюбҷон», «Қозӣ», «Худойдод» ва дигарон, ки шахсияташон ба тафтишот маълум нест, ба маблағи 2000 доллари ИМА дар 3 халта ба миқдори 47760,0 грамм воситаи нашъадори навъи бангдонаи хушкондашударо хариданд.
Рӯзи 19 феврали соли 2016 марҳилаи дуюми чорабинии фаврӣ гузаронида шуда, харидорони шартӣ аз ин гурӯҳи муташаккили ҷиноятӣ дар 2 борхалта 49664,0 грамм воситаи нашъадори бангдонаи хушкондашуда, дар як борхалта 9261,0 грамм воситаи нашъадори навъи ҳашиш ва 956,8 грамм воситаи нашъадори навъи афюнро ба таври насия хариданд.
Роҳбари гурӯҳи муташаккили ҷиноятӣ Қадрулло валади Назирбой бо мақсади дастрас намудани маблағи насия Азизулло валади Зоҳирро ба ивази фоидаи калони пулӣ барои омадан ба Ҷумҳурии Тоҷикистон розӣ менамояд.
Азизулло валади Зоҳир ба ин таклиф розӣ шуда, 24 марти соли 2016 ба кӯчаи Суғдиёни шаҳри Кӯлоби вилояти Хатлон омада, аз шахси миёнарав 1800 доллари ИМА-ро талаб намуда мегирад, ки дар ҳамин асно аз тарафи кормандони милиса дастгир мегардад.
Бо ҳукми суд Азизулло валади Зоҳир бо моддаҳои дар боло зикршуда гунаҳгор дониста шуда, нисбат ба ӯ ҷазо дар намуди маҳрум сохтан аз озодӣ ба муҳлати 17 сол бо адо намудани ҷазо дар муассисаи ислоҳии дорои низоми пурзӯр таъйин гардид.
Азизулло валади Зоҳир аз кирдори ҷинояткоронааш сахт пушаймон аст. Вале тавре дар урфият мегӯянд: «Худкардаро даво нест, вовайлои пинҳонӣ».

Февраль 15, 2017 17:28

Хабарҳои дигари ин бахш

Ҷавонон бояд қарзи шаҳрвандӣ — таҳсили илму дониш ва саҳмгузорӣ дар пешрафти Ватанро софдилона иҷро намоянд
Тоҷикистон дар мубориза бо қочоқ ва муомилоти ғайриқонунии маводи нашъаовар нақши калидӣ дорад
Ҳайати Тоҷикистон дар чорабиниҳои канорӣ дар доираи иҷлосияи 67-уми Комиссияи Созмони Милали Муттаҳид оид ба воситаҳои нашъадор иштирок намуд
Дар Вена ҳамкории Тоҷикистон бо Чин ва Эрон дар мубориза бо муомилоти ғайриқонунии маводи нашъадор баррасӣ шуд
Ҷаласаи гурӯҳҳои кории ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон баргузор гардид
Ҳайати Тоҷикистон дар чорабинии канории Қазоқистон дар Вена иштирок намуд
Дар Вена оид ба сиёсати зиддимухаддиротии Ҷумҳурии Тоҷикистон маълумот дода шуд
Мулоқоти ҳамраисони ҳайатҳои ҳукуматии Тоҷикистон ва Қирғизистон оид ба делимитатсия ва демаркатсияи сарҳади давлатӣ доир гардид
Тарбияи ватандӯстӣ — омили муттаҳидии миллат дар мубориза бар зидди ифротгароӣ ва хурофотпарастӣ
Ҳайати Тоҷикистон дар иҷлосияи 67-уми Комиссияи Созмони Милали Муттаҳид оид ба воситаҳои нашъадор дар Вена иштирок дорад
14 МАРТ-ИДИ КАСБИИ КОРМАНДОНИ ПРОКУРАТУРА. Давоми 32 сол фаъолияти ин ниҳоди давлатӣ ба таври назаррас тақвият ёфт
Эмомалӣ Раҳмон: «Хурофот хатарест, ки ба имрӯзу ояндаи Тоҷикистон ва минтақа таҳдиди ҷиддӣ дорад»