Фарҳод Раҳимӣ: «Мақсади асосии мо шаффоф гузаронидани олимпиада мебошад»

Март 10, 2017 16:44

ДУШАНБЕ, 10.03.2017 /АМИТ «Ховар»/. Имрӯз дар Академияи илмҳои Ҷумҳурии Тоҷикистон бахшида ба Соли ҷавонон ва бо мақсади баланд бардоштани шавқу ҳаваси донишҷўёни муассисаҳои таҳсилоти олии касбии ҷумҳурӣ ба омўзиши илмҳои муосир, ташаккули тафаккури илмӣ ва техникии онҳо, инчунин дарёфти донишҷўёни лаёқатманд ҷиҳати ҷалби онҳо ба соҳаҳои илм олимпиадаи донишҷўёни муассисаҳои таҳсилоти олии касбии ҷумҳурӣ барои дарёфти «Ҷоми Академияи илмҳои Ҷумҳурии Тоҷикистон» оғоз гардид.
Тавре мухбири АМИТ «Ховар» хабар медиҳад, дар олимпиадаи мазкур донишҷўёни зинаи бакалавр ва мутахассиси курсҳои 1-5-уми муассисаҳои таҳсилоти олии касбӣ аз рӯи илмҳои математика, физика, астрономия, химия, геология, биология, иқтисодиёт, технологияҳои иттилоотӣ, забон ва адабиёти тоҷик, таърих, фалсафа, ҳуқуқ ва сиёсатшиносӣ иштирок доранд.
«Соли 4-ум аст, ки чун анъана мо дар байни донишҷӯёни муассисаҳои таҳсилоти олии касбӣ барои дарёфти «Ҷоми Академияи илмҳои Ҷумҳурии Тоҷикистон» озмун мегузаронем. Мо тамоми имконот ва шароитеро, ки дар даст дорем, пеш аз ҳама барои шаффоф баргузор гардидани ин озмун сафарбар кардаем. Ба ин хотир раисони комиссияҳои фаннии озмун олимони шинохтаи кишвар мебошанд, ки имрӯз роҳбарияти институтҳои илмӣ-тадқиқотии Академияи илмҳои Ҷумҳурии Тоҷикистонро бар дӯш доранд, ки ин барои шаффоф баргузор гардидани озмун замина фароҳам хоҳад овард»,- иброз дошт Фарҳод Раҳимӣ, президенти Академияи илмҳои Ҷумҳурии Тоҷикистон.
«Дар даври якуми олимпиадаи мазкур, ки дар 28 муассисаи таҳсилоти олии касбии ҷумҳурӣ баргузор гардид, зиёда аз 260 нафар ғолибон барои иштирок дар даври ниҳоӣ, ки дар Академияи илмҳои Ҷумҳурии Тоҷикистон баргузор гардида истодааст, пешниҳод шудаанд»,-зикр шуд дар оғози олимпиадаи мазкур.
Раҳматулло Мирбобоев, муовини якуми Вазири маориф ва илми Ҷумҳурии Тоҷикистон ва Дилноза Аҳмадзода, муовини Раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон аз таваҷҷуҳ ва ғамхории давлат ва Ҳукумати Ҷумҳурии Тоҷикистон, махсусан Пешвои миллат муҳтарам Эмомалӣ Раҳмон нисбат ба ҷавонон, ки қишри асосии кишварро ташкил медиҳанд, ёдовар шуда, онҳоро ба омӯхтани илмҳои дақиқ, муосир ва забонҳои хориҷӣ даъвар намуданд.
Раҳматулло Мирбобоев зикр кард, ки «иштироки ҷавонони соҳибилм ва бомаърифат дар давраи ниҳоии олимпиада гувоҳи он аст, ки шумо ғолибиятро ба даст овардаед. Пас аз ба даст овардани ғолибияти умумӣ дар ин олимпиада, шумо имкон пайдо мекунед, ки дар зинаҳои магистратура ва аспирантураи Академияи илмҳои Ҷумҳурии Тоҷикистон таҳсил намуда, ба унвонҳои илмӣ мушарраф гардед».
Ғолибони олимпиада аз рӯйи натиҷаҳои холҳо муайян карда шуда, ба ғолибони ҷойи якум дар ҳар як соҳаи илм «Ҷоми Академияи илмҳои Ҷумҳурии Тоҷикистон» супорида мешавад.
Инчунин иштирокчиёни давраи ниҳоии олимпиада, ки дар соҳаҳои мухталифи илм ҷойҳои чорум ва панҷумро ишғол менамоянд, бо «Ифтихорномаи Академияи илмҳои Ҷумҳурии Тоҷикистон» сарфароз гардонида мешаванд.

Март 10, 2017 16:44

Хабарҳои дигари ин бахш

«МегаФон Life»: маблағро тариқи паёмрасон интиқол диҳед!
Дар Бадахшон масъалаи таъмири роҳҳои дорои аҳамияти маҳаллӣ баррасӣ гардид
Дар Сарраёсати ҳифзи муҳити зист дар шаҳри Душанбе Маркази мониторинги камераҳои мушоҳидавӣ фаъол гардид
Имрӯз дар Тоҷикистон ҳаво тағйирёбанда шуда, борон ва раъду барқ пешгӯӣ мешавад
Дар ноҳияи Файзобод бо фаъолону собиқадорон ва ходимони дини деҳоти Чашмасор мулоқот доир гардид
Дар ду қисми низомии тобеи Вазорати корҳои дохилии Тоҷикистон дастархони идона ороста гардид
Дар ноҳияи Деваштич маъракаи кишти картошка оғоз шуд
Иҷлосияи нуздаҳуми Маҷлиси вакилони халқи вилояти Хатлон, даъвати шашум доир гардид
Дар пайравӣ ба амалҳои хайрхоҳонаи Президенти Тоҷикистон дар якчанд қисми ҳарбӣ дастурхони идона ороста шуд
Дар Неругоҳи барқи обии «Норак» ҷашни байналмилалии Наврӯз бо шаҳомати хосса таҷлил гардид
Имрӯз дар Тоҷикистон ҳаво тағйирёбанда шуда, борон ва раъду барқ пешгӯӣ мешавад
Наврӯз ҳамчун ҷашни эҳёи табиат истифодаи оқилонаи заминро талқин менамояд