Қӯшунҳои сарҳадии КДАМ ҶТ: «Ҳамкориро бо аҳолии навоҳии наздисарҳадӣ пурзӯр бояд кард»

Март 2, 2017 17:12

ДУШАНБЕ, 02.03.2017 /АМИТ «Ховар»/. Масъулони Қӯшунҳои сарҳадии Кумитаи давлатии амнияти миллии Ҷумҳурии Тоҷикистон бо дастгирии Мақомоти иҷроияи ҳокимияти давлатии вилояти Хатлон дар шаҳри Қӯрғонтеппа дар мавзӯи «Мубориза бар зидди маводи нашъадор аз сарҳади давлатӣ оғоз мешавад» машварат баргузор намуданд.
Муҳаммад Улуғхоҷаев, сардори маркази матбуоти Қӯшунҳои сарҳадӣ, мақсади машваратро дар пурзӯр намудани корҳои фаҳмондадиҳӣ дар байни аҳолии минтақаҳои наздисарҳадӣ, ҳамчунин воқифсозии онҳо бо талаботи Қонуни Ҷумҳурии Тоҷикистон «Дар бораи сарҳади давлатии Ҷумҳурии Тоҷикистон», пешгирии интиқол ва паҳншавии маводи нашъаовар ва ҷалби аҳолии минтақаҳои сарҳадӣ ба муҳофизати сарҳади давлатӣ арзёбӣ намуд.
Ба иттилои манбаъ, зимни машварат подполковник Насимҷон Раҷабов, сардори Раёсати муҳофизати сарҳади давлатии Сарситоди Қӯшунҳои сарҳадии КДАМ Ҷумҳурии Тоҷикистон дар мавзӯи «Қӯшунҳои сарҳадӣ дар самти мубориза бар зидди маводи нашъадор» маърӯза намуда, зикр кард, ки дар таъмини амнияти давлат танҳо бо қувваи сарҳадбонон ба натиҷаҳои назаррас ноил гардидан душвор аст. Аз ин лиҳоз, моро зарур аст, ки кӯшишҳои худро барои мубориза ва пешгирии ҳама намудҳои қонунвайронкунӣ дар сарҳад равона карда, ҳамкории зичро ба роҳ монем.
Ҳамчунин зикр гардид, ки ҳамкории аҳолӣ бо Қӯшунҳои сарҳадӣ хеле заиф аст. Баръакс, дар бисёр ҳолатҳо дар муомилоти ғайриқонунии маводи нашъадор бештар сокинони маҳаллаҳои аҳолинишини наздисарҳадӣ даст доранд ва ба қочоқчиён мусоидат мекунанд.
Ба маълумоти Насимҷон Раҷабов, дар соли 2016 зиёда аз 250 нафар вайронкунандаи сарҳади давлатӣ дастгир гардида, баъди барасмиятдарорӣ як қисми онҳо ба намояндагони сарҳадии Ҷумҳурии Исломии Афғонистон супорида шуданд.
Дар мавзӯи «Вазъи гардиши маводи нашъадор дар ҷумҳурӣ ва минтақа: тадбирҳои пешгирии нашъамандӣ» муовини сардори Раёсати Агентии назорати маводи нашъаовари назди Президенти Ҷумҳурии Тоҷикистон дар вилояти Хатлон подполковник Диловар Сафаров зикр кард, ки дар ҳудуди вилояти Хатлон шумораи нашъамандон дар соли 2017 ба 1385 нафар расидааст ва аз ин шумора 18 нафарашон занҳо мебошанд. Ба қавли ӯ, шумораи нашъамандон нисбат ба соли гузашта 54 нафар коҳиш ёфтааст.
Мусодираи маводи мухаддир ба минтақаи Кӯлоб 1243 кг 562 г (77%) ва ба минтақаи Қӯрғонтеппа 338 кг 501 г (21%) рост меояд, — гуфтДиловар Сафаров. Аксари ин мавод дар ноҳияҳои наздисарҳадӣ, аз ҷумла Панҷ (165 кг 732 г), Ҳамадонӣ (263 кг 670 г), Шамсиддини Шоҳин (604 кг 754 г), Фархор (279 кг 574 г) мусодира карда шудаанд.
Мувофиқи маълумотномаи Маркази наркологии вилояти Хатлон, шумораи беморони нашъаманд аз ҳама зиёд дар шаҳрҳои Кӯлоб, Қӯрғонтеппа, ноҳияҳои Вахш, Восеъ, Фархор, Ёвон, Ҷ. Балхӣ ва Бохтар ба қайд гирифта шудааст.
Дар соли 2016 аз тарафи кормандони Раёсати Агентии назорати маводи нашъаовари назди Президенти Ҷумҳурии Тоҷикистон дар вилояти Хатлон 126 нафар истеъмолкунандагони воситаҳои нашъадор дар қайди маркази наркологӣ гузошта шудаанд ва онҳо пайваста таҳти назорат қарор доранд, — зикр кард Д. Сафаров.
Дар асоси маълумоти Маркази бемориҳои нашъамандии вилоят, дар соли 2016-ум 4 сокини шаҳри Қӯрғонтеппа аз истеъмоли барзиёди воситаҳои нашъадор фавтиданд. Диловар Сафаров иброз дошт, ки маводи нашъаовар барои генофонд ва амнияти миллӣ хавфи калон дорад.
Мубориза бар зидди ин зуҳуроти номатлуб танҳо вазифаи сохторҳои қудратӣ набуда, балки масъулияти ҳамагон ба шумор меравад. Муборизаи дастаҷамъона метавонад сади роҳи ин омилҳо гардад.

Март 2, 2017 17:12

Хабарҳои дигари ин бахш

Дар ноҳияи Файзобод бо фаъолону собиқадорон ва ходимони дини деҳоти Чашмасор мулоқот доир гардид
Дар ду қисми низомии тобеи Вазорати корҳои дохилии Тоҷикистон дастархони идона ороста гардид
Дар ноҳияи Деваштич маъракаи кишти картошка оғоз шуд
Иҷлосияи нуздаҳуми Маҷлиси вакилони халқи вилояти Хатлон, даъвати шашум доир гардид
Дар пайравӣ ба амалҳои хайрхоҳонаи Президенти Тоҷикистон дар якчанд қисми ҳарбӣ дастурхони идона ороста шуд
Дар Неругоҳи барқи обии «Норак» ҷашни байналмилалии Наврӯз бо шаҳомати хосса таҷлил гардид
Имрӯз дар Тоҷикистон ҳаво тағйирёбанда шуда, борон ва раъду барқ пешгӯӣ мешавад
Наврӯз ҳамчун ҷашни эҳёи табиат истифодаи оқилонаи заминро талқин менамояд
Кишоварзони ноҳияи Зафаробод дар 120 гектар картошкаи барвақтӣ кишт менамоянд
Дар Агентии содироти Тоҷикистон бо намояндагони Агентии назорати давлатии молиявӣ ва мубориза бо коррупсия вохӯрӣ доир шуд
Ба кишоварзони ноҳияи Деваштич барои парвариши картошка ва тухмиҳои хушсифат тавсияҳо дода шуд
Дар ноҳияи Спитамени вилояти Суғд кишти чигит оғоз ёфт