Ҳамоиши байналмилалӣ ба ифтихори 100-солагии Ҳунарманди халқии Иттиҳоди Шӯравӣ Туҳфа Фозилова

Апрел 18, 2017 15:45

Хабарҳои мавзӯъ

Конфронси Тухфа Фозилова (8)

ДУШАНБЕ, 18.04.2017/АМИТ «Ховар»/. «Анъана ва меросбарӣ дар фарҳанги театрию мусиқии мардумони Осиёи Марказӣ: дирӯз ва имрӯз»- таҳти чунин унвон имрӯз дар шаҳри Душанбе ба ифтихори 100-солагии яке аз ҳунармандони мумтози Ҷумҳурии Тоҷикистон, Артисткаи халқии СССР, барандаи Ҷоизаи давлатии Ҷумҳурии Тоҷикистон ба номи Абӯабдулло Рӯдакӣ, шодравон Туҳфа Фозилова (1917-1984) ҳамоиши байналмилалии илмӣ доир гардид. Дар ҳамоиш, ки бо ибтикори Академияи илмҳои Ҷумҳурии Тоҷикистон созмон дода шуд, олимону донишмандон ва мусиқишиносон аз кишварҳои Тоҷикистон, Россия, Озарбойҷон ва Ӯзбекистон иштирок намуданд.
Дар маросими ифтитоҳи ҳамоиш Вазири фарҳанги Ҷумҳурии Тоҷикистон Шамсиддин Орумбекзода, президенти Академияи илмҳои Ҷумҳурии Тоҷикистон Фарҳод Раҳимӣ, инчунин адибону донишмандон доир ба сиёсати фарҳангии Пешвои миллат Эмомалӣ Раҳмон ҷиҳати арҷ гузоштан ба истеъдод ва ҳунари волои шахсиятҳои бузурги фарҳангӣ, бахусус ҳунарпешаи маъруф Туҳфа Фозилова ибрози назар намуданд. Ҳамзамон Сафири Фавқулода ва Мухтори Ҷумҳурии Озарбойҷон дар Ҷумҳурии Тоҷикистон Аббосалӣ Гасанов доир ба робитаҳои фарҳангии Тоҷикистону Озарбойҷон дар симои Туҳфа Фозилова сухан кард.
Таъкид гардид, ки Туҳфа Фозилова бо ҳунари нотакрори саҳнаороию ҳунармандӣ дар рушди санъати мусиқӣ ва театри тоҷик саҳми шоиста гузоштааст. Номбурда дар баробари сарояндаи хушсалиқа будан дар ташаккули санъат ва мактаби актёрӣ, инчунин театри касбии тоҷик ба ҳайси устод нақши бузург гузошт. Туҳфа Фозилова дар саҳнаи театри драмавии тоҷик нақшҳои зиёде аз драматургияи миллӣ ва ҷаҳонӣ офаридааст, ки Ҳалима («Ҳалима»- Ғ. Зафарӣ), Гулсара («Гулсара»-К.Яшин), Гулнор («Дохунда»-Ҷ. Икромӣ), Моҳтоб («Духтари ноком» Ҷ. Икромӣ), Бону («Рӯдакӣ»-С. Улуғзода ), Гонериля («Шоҳ Лир»-В. Шекспир), Милфорд («Макр ва муҳаббат»-и Ф.Шиллер), Гертруда («Модарандар»- О. Балзак) аз ҷумлаи онҳоянд.
Инчунин Туҳфа Фозилова дар рушди санъати синамои миллӣ саҳми бориз гузошта, дар филмномаҳои «Дохунда», «Ибни Сино», «Тӯфон дар Осиё», «Зумрад», «Имрӯз ва фардо», «Достони ду дилдода» нақш офаридааст.

Дар ҳамоиш зикр гардид, ки саҳми Туҳфа Фозилова дар тарғибу иҷрои мусиқии мардумию классикӣ ва оҳангсозии тоҷик ва кишварҳои ҳавзаи Осиёи Марказӣ бузург аст. Туҳфа Фозилова чун сарояндаи бомаҳорат тарона, суруд, бадеҳаҳои тоҷикӣ, ӯзбекӣ, суруду романсҳои бастакорони тоҷику ӯзбекро ба таври нотакрор пешкаши дӯстдорони мусиқӣ гардонидааст. Беш аз чил суруду таронаҳои Туҳфа Фозилова дар Хазинаи тиллоии радиои тоҷик маҳфузанд, аз ҷумла «Алла», «Берун биё», «Бихандад лола», «Гулумой», «Дар кӯҳу дар дашт», «Ёр меояд», «Ёри мастчоҳӣ», «Чашмони ҷоду», «Шоҳдухтар», «Сабзак дона-дона», ки бо гузашти солҳои тӯлонӣ то ба ҳол вирди забони мардуманд. Бояд тазаккур дод, ки хизматҳои шоиста ва саҳми босазои устоди санъати тоҷик Туҳфа Фозилова дар ташаккули санъати касбии тоҷик бо унвону ҷоизаҳо, ифтихорномаҳои давлатии СССР, ҷумҳуриҳои собиқ Иттиҳоди Шӯравӣ ва Ҷумҳурии Тоҷикистон қадр гардидаанд. Соли 1985 Театри мусиқию драмавии шаҳри Конибодом ба номи Тӯҳфа Фозилова гузошта шуд.
Мавриди зикр аст, ки соли равон бо Қарори Ҳукумати Ҷумҳурии Тоҷикистон 100-солагии бунёдгузори кохи санъати тоҷик Туҳфа Фозилова таҷлил мегардад. Туҳфа Фозилова дар тӯли умри пурбарати худ тавонист бо маҳорати баланди касбӣ- сарояндагӣ ва саҳнаофарӣ дар ташаккул ва муаррифии фарҳанги тоҷикон саҳми шоиста гузорад.
Иштирокдорони ҳамоиши байналмилалӣ ҳамзамон доир ба дигар паҳлӯҳои ҳаёт ва фаъолияти нобиғаи санъати тоҷик Туҳфа Фозилова ибрози назар намуданд.

Конфронси Тухфа Фозилова (11)

Апрел 18, 2017 15:45

Хабарҳои дигари ин бахш

хоби хамдуна«Хоби ҳамдуна»- и Румӣ Шоазимов дар Кинофестивали 23-юми Россия «Адабиёт ва синамо» соҳиби мукофот гардид
тф -1Фарҳанг ҳастии миллат аст. Аз солрӯзи ҳунарманди мумтози тоҷик Туҳфа Фозилова сад сол сипарӣ гардид
????????????????????????????????????Нашри китоби нав ба ифтихори 100-солагии нобиғаи санъати тоҷик Туҳфа Фозилова
Фехристи номхоБа Феҳристи номҳои миллии тоҷикӣ беҳтарин номҳо ворид шудаанд
Парасту 2017Фестивал-озмуни «Парасту-2017» ба 100-солагии Тӯҳфа Фозилова бахшида мешавад
17952024_1953005378254076_5078309082709608086_nДар шаҳри Берлин шоми фарҳанги тоҷик доир гардид
v farhangШамсиддин Орумбекзода: «Дари Тоҷикистон барои муносибатҳои фарҳангӣ бо дигар кишварҳо ҳамеша боз аст»
Дар Париж бахшида ба 20-солагии Вахдати милли намоишгохи тасвирхо баргузор гардидДар Париж бахшида ба 20-солагии Ваҳдати миллӣ намоиши тасвирҳо баргузор гардид
мучассамаи абармардони миллати точикДар саҳни бинои СММ дар Вена муҷассамаи донишмандони бузурги тоҷик гузошта шуд
DSC_0232+Маҳфили адабӣ ва рӯнамоии китобҳои нави Абдураҳмони Абдуманнон дар Хонаи адибон
Волос АндрейТоҷикистон ба харитаи адабии ҷаҳон шомил шуд
Китоби «Варзиш - соҳаи мавриди назари Пешвои миллат Эмомалӣ Раҳмон» аз чоп баромадКитоби «Варзиш-соҳаи мавриди назари Пешвои миллат Эмомалӣ Раҳмон» ба нашр расид