Маҳфили адабӣ ва рӯнамоии китобҳои нави Абдураҳмони Абдуманнон дар Хонаи адибон

Апрель 7, 2017 17:25

ДУШАНБЕ, 07.04.2017 /АМИТ «Ховар»/. Имрӯз дар Хонаи адибони ба номи Мирзо Турсунзода маҳфили адабӣ ва рӯнамоии китобҳои нави адабиётшинос ва тарҷумони шинохта Абдураҳмони Абдуманнон баргузор гардид.
Тавре хабарнигори АМИТ «Ховар» аз макони баргузории маҳфил хабар дод, ҳамоишро Раиси Иттифоқи нависандагони Тоҷикистон Низом Қосим ифтитоҳ бахшид. Сипас, адибони шинохтаи кишвар Абдулҳамид Самад, Камол Насрулло, Саттор Турсун, Гулрухсор, Аскар Ҳаким, Муҳаммад Ғоиб ва Давлат Сафар дар бораи ҳаёту фаъолият ва роҳи тайнамудаи Абдураҳмони Абдуманнон сухан гуфтанд. Зикр гардид, ки Абдураҳмони Абдуманнон ҳамчун адиб ва олим пажӯҳишҳову эҷодкориҳои муваффақонае ба анҷом расонидааст, ки дар адабиётшиносӣ, нақди адабӣ, тарҷумаи бадеӣ, шинохти симоҳои таърихӣ, забони тоҷикӣ ва осори адибони гузаштаву имрӯза арзиши баланд доранд. Аз иштирок дар таълифи асари шашҷилдаи «Таърихи адабиёти советии тоҷик. Инкишофи жанрҳо» оғоз карда, то таълифи китобҳои «Нуқтаи назар», «Пиндорҳо ва ингорҳо», «Фурӯғи чеҳраҳо», «Ламҳае ба роҳи рӯзгор» ва садҳо мақолаҳояш саҳми боризи худро дар адибиёти муосири мо гузоштааст. Мавсуф дар шинохти симои эҷодии Абдулқосим Лоҳутӣ, Пайрав Сулаймонӣ, Ғанӣ Абдулло, Абдусалом Деҳотӣ, Раҳим Ҳошим, Муҳаммадҷон Шакурӣ, дар пажӯҳишу таҳқиқи осори Мирзо Турсунзода, Мирсаид Миршакар, Муъмин Қаноат, Лоиқ Шералӣ, Бозор Собир, Гулрухсору Гулназар, Камол Насруллову Раҳмат Назрӣ ва даҳҳо шоирони муосир, дар нигориши чеҳраҳои шахсиятҳои барҷастаи ҷомеаи мо- аз Бобоҷон Ғафуров то Муҳаммад Осимӣ саҳми арзанда гузоштааст.
Пажӯҳишу таҳқиқоти адибиётшиносии ӯ бо тозагии назар, нигоҳи амиқ ва баёни мушаххас фарқ мекунанд.
Қобили зикр аст, ки таҳқиқоти адибиётшиносии Абдураҳмони Абдуманнон, хусусан дар шинохти шеъри муосир хеле муҳим аст ва аҳамияти зиёд дорад.
Сарояндагони шинохта Баҳодур Неъматов, Ҷӯрабек Назрӣ, Афзалшо Шодиев, Абдувалӣ Абдурашидов ва дигарон ба маҳфил ҳусни дигар зам намуданд.
Мавриди ёдоварист, ки Абдураҳмони Абдуманнон дар вазифаҳои мудири шуъбаи Сарредаксияи илмии «Энсиклопедияи советии тоҷик», муовини аввали директори Институти забон ва адабиёти ба номи Рӯдакӣ, муовини аввали Раиси Иттифоқи нависандагони Тоҷикистон, мудири шуъбаҳои иттилоотию таҳлилӣ ва фарҳанги Дастгоҳи иҷроияи Президенти Ҷумҳурии Тоҷикистон, муовини аввали Раиси Кумитаи телевизион ва радиои назди Ҳукумати Ҷумҳурии Тоҷикистон фаъолият намудааст.
Дар давраи хизмати давлатӣ низ пайваста фаъолияти адабиву илмиро идома дода, қисме аз осори тадқиқиву адабиаш дар китоби «Пиндорҳо ва ингорҳо» («Адиб», 2006) гирд омадаанд. Дар китобҳои «Фурӯғи чеҳраҳо» (2015) ва «Ламҳае ба роҳи рӯзгор» (2017) мусаввараҳои адабӣ ва ёддоштҳояш оид ба аҳли илму фарҳанг ҷойгузин гаштаанд. Дар матбуоти ватаниву хориҷӣ беш аз дусад мақолаи илмиву адабиаш ба табъ расидаанд.
Яке аз самтҳои фаъолияти адабии Абдураҳмони Абдуманнон тарҷумаи бадеист. Романҳои С. Баруздин «Такрори дарсҳои гузашта», О. Ёқубов «Виҷдон», маҷмӯаи қиссаву ҳикояҳои Элчин «Ишқи аввали Балададаш», Ю. Збанатский «Хорпушти олиҳиммат», қиссаи Б.Василйев «Субҳи ин ҷо сокит аст», намоишномаи Маҳмудхоҷаи Беҳбудӣ «Падаркуш», қиссаи «Булутакҳои Останкино» — и И.Ракша, ҳикояҳои ҷудогонаи А.П.Чехов, Ўткур Ҳошимов ва Анорро ба тоҷикӣ баргардонидааст.
Абдураҳмони Абдуманнон барои хизматҳои шоён дар рушди илми тоҷик бо мукофотҳои давлатӣ- унвони Корманди шоистаи Ҷумҳурии Тоҷикистон, орденҳои Шараф дараҷаи 1, Дӯстӣ, медали 20-солагии Истиқлолияти давлатии Тоҷикистон (2011) сарфароз гардида, дорандаи Ҷоизаи адабии ба номи Мирзо Турсунзода (2007) мебошад.

Апрель 7, 2017 17:25

Хабарҳои дигари ин бахш

ЭЪЛОН: «ВАССОФИ ВАТАН». Барои рӯзноманигорон ва корбарони саҳифаҳои иҷтимоии шабакаҳои интернетӣ фестивал-озмун баргузор мешавад
Тандиси биринҷии чеҳраи Президенти Тоҷикистон ба Осорхонаи миллӣ супорида шуд
АЗ НАВРӮЗ ТО НАВРӮЗ. Дар Донишкадаи давлатии санъати тасвирӣ ва дизайни Тоҷикистон фестивали муд баргузор мегардад
ИМРӮЗ-РӮЗИ ҶАҲОНИИ ТЕАТР. Дар давраи соҳибистиқлолӣ дар Тоҷикистон барои пешрафти санъати касбии театрӣ шароити мусоид фароҳам оварда шуд
«САЙРИ ГУЛИ ЛОЛА». Дар Суғд Фестивали вилоятии гулҳо доир мешавад
КОНИ ЛАЗЗАТ ВА ХОНИ НЕЪМАТ. Хабарнигори АМИТ «Ховар» оид ба таомҳои наврӯзӣ дар Бадахшон маълумот ҷамъоварӣ намуд
НАВРӮЗ-МАҲБУБТАРИН ҶАШНИ МИЛЛИИ ТОҶИКОН. Суратгузориш аз таҷлили бошукуҳи ҷашни Наврӯз дар Академияи миллии илмҳои Тоҷикистон
Байни Китобхонаи миллии Тоҷикистон ва Китобхонаи оммавӣ, илмӣ-техникии шуъбаи Академияи илмҳои Русия дар минтақаи Сибир Созишномаи ҳамкорӣ ба имзо расид
Оши бурида дар Наврӯз ҳамчун рамзи умри дароз ва ҳаёти хушбахтона омода мешавад
НАВРӮЗ — ҶАШНИ ЭҲЁ. Ин ҷашни ҷаҳонӣ бунёди маънавии миллати тоҷик мебошад
МАЗМУНҲОИ НАВРӮЗӢ ДАР АШЪОРИ АҲДИ КЛАССИКИИ ФОРСУ ТОҶИК. Андешаҳои адабиётшинос дар хусус
НАВРӮЗ ДАР ЗАРАФШОН. Он бо «тухмҷангак»-и кӯдакон оғоз мегардад