Ҷоми КФО: «Истиқлол» «Олой»-ро ҳарифи пурқувват меҳисобад

Апрел 17, 2017 16:09

Хабарҳои мавзӯъ

Истиклол Олой

ДУШАНБЕ, 17.04.2017/АМИТ «Ховар»/. Имрӯз дар меҳмонхонаи «Ҳаятт Реҷенси Душанбе» нишасти матбуотии сармураббиёни дастаҳои «Истиқлол» ва «Олой»-и Қирғизистон, ки дар доираи даври сеюми марҳилаи гурӯҳии Ҷоми Конфедератсияи футболи Осиё (КФО) дар гурӯҳи «D» 18 апрел дар Варзишгоҳии марказии шаҳри Душанбе бо ҳам қувва месанҷанд, ҷараён гирифт.
Сармураббии дастаи «Истиқлол»-и Душанбе Мӯҳсин Муҳаммадиев новобаста аз он ки дастаи «Олой» дар зинаи охири ҷадвали гурӯҳ қарор дошта, то ҳол имтиёзе ба даст наовардааст, нисбат ба он эҳтиром дорад ва онро баробари дастаҳои дигари гурӯҳ мешуморад.
«Олой» дастаи хеле хуб ва ҷиддӣ аст, умуман дар гурӯҳи мо ҳама дастаҳо баробаранд. Моро бозии пумасъулияту тезутунд дар пеш аст. Аз сабаби он ки «Олой» ду бозиро бохтааст, танҳо барои имтиёз гирифтан ба майдон мебарояд, онҳо чизеро бой намедиҳанд. Мо ҳам омодаем, ки бозии хуб нишон диҳем. Рӯҳияи бозингарон болида аст, чун дар бораи Фарҳод Восиев пурсидед, ӯ оҳиста-оҳиста саломатиашро барқарор карда, барои ба майдон омадан тайёр мешавад ва дар бозиҳои оянда ӯ ба даста кумак хоҳад расонд. Мутаассифона, Ромиш Ҷалилов дар бозии гузашта хатои дағал кард, бо корти дуюми зард аз майдон ронда шуд ва дар бозӣ бо «Олой» иштирок намекунад. Дақиқаҳои охир буд ва Ромиш бояд тартиботро риоя мекард. Умед дорем, ки дар рӯзи бозӣ варзишгоҳ пур аз мухлисон мешавад ва мо бо кумаки онҳо ба ғалаба комёб мегардем»,-гуфт дар нишаст Мӯҳсин Муҳаммадиев.
Сармураббии дастаи «Олой» Немат Кошоков дар бораи дастаи «Истиқлол» маълумоти зиёд дорад. «Ҳамаи бозингарони «Истиқлол» узви дастаи мунтахаби Тоҷикистон мебошанд, аз ин рӯ моро муборизаи пуршиддат дар пеш аст. То ҳол мо имконияти ба даври минбаъда баромаданро аз даст надодаем ва умед дорем, ки моро ғалабаҳо интизоранд. Дар вохӯрӣ бо дастаи «Дордой» дар дақиқаи 17-ум аз майдон ронда шудани бозингари мо Ахмедов ва майдони номувофиқ ба бозӣ сабаби бохти мо гардид. Мо дар вохӯриҳои боқимонда худро бояд нишон диҳем»,- изҳор дошт Немат Кошоков.
Дар ҳайати дастаи «Олой» ду бозингари ба мухлисони Тоҷикистон ошно-Алиа Силлаи ганагӣ, ки соли 2013-2014 дар ҳайати дастаҳои «Барқчӣ» ва КМВА «Помир», инчунин Владимир Верёвкин, ки дар ҳайати «Хайр» (Ҷоми КФО) ҳунарнамоӣ кардаанд, бозӣ мекунанд. Владимир Верёвкин дар нишасти хабарӣ ширкат карда, иброз дошт, ки новобаста ба пурқувват будани дастаи «Истиқлол», «Олой» бо мақсади ғалаба ба майдон меояд, вале хати ҳимоя аз Манучеҳр Ҷалилов хавотир аст. «Чемпионати Тоҷикистон ва Қирғизистон ба ҳам наздик ҳастанд, дараҷаи бозии дастаҳо ҳам. Аз ин рӯ кӯшиш мекунем, ки ба «Истиқлол» рақобати арзанда нишон диҳем», -гуфт дар анҷом Владимир Верёвкин.
Ёдрас мекунем, ки бозии даври сеюми марҳилаи гурӯҳии Ҷоми КФО байни дастаҳои «Истиқлол» ва «Олой» 18 апрел соати 19:00 дар Варзишгоҳи марказии шаҳри Душанбе доир мегардад.

Апрел 17, 2017 16:09

Хабарҳои дигари ин бахш

Сомон МахмадбековСомон Маҳмадбеков, варзишгари тоҷик дар Ҷоми Африқо оид ба дзюдо миёни наврасон медали тилло ба даст овард!
Дар шаҳри Ваҳдат бахшида 20-солагии Рӯзи Ваҳдати миллӣ мусобиқаи футбол доир гардидДар шаҳри Ваҳдат бахшида 20-солагии Рӯзи Ваҳдати миллӣ мусобиқаи футбол доир гардид
Истиқлол АлайБозии олии Дэвид Мауто ва ғалабаи «Истиқлол» бар «Олой»
Чемпионат barkchi-khujand2Футбол, лигаи олӣ, даври шашум: ҳамагӣ панҷ гол дар чор бозӣ
Чемпиогни Қирғизистон баЧемпиони Қирғизистон ба Душанбе омад
futsal-in-schools4Машғулиятҳо аз рӯи лоиҳаи «Футзал дар мактабҳо» ҷамъбаст гардиданд
istiklol-panjsherҒалабаи «Истиқлол» бар «Панҷшер» пеш аз бозии Ҷоми КФО бо «Олой»
Варзишгарони Суғд дар мусобиқаҳои ватанию байналмилалӣ 570 медал ба даст овардандВарзишгарони Суғд дар мусобиқаҳои ватанию байналмилалӣ 570 медал ба даст оварданд
Бокс«Ҳамсафи мардони пурқувват» ва ё аввалин мусобиқаи духтарони боксчӣ
khayr-vakhsh5Аввалин ғалабаи КМВА «Помир» ва «Вахш» дар мавсими нави футболи Тоҷикистон
ДоваронБозии «Истиқлол» ва «Олой»-и Қирғизистонро доварони Япония ҳакамӣ мекунанд
Лигаи якумМавсими футбол дар лигаи якуми Чемпионати Тоҷикистон 14 апрел оғоз меёбад