ИНТОКСИКАТСИЯ? Дар ноҳияи Ишкошим шумораи заҳролудшудагон ба 34 нафар расид

Февраль 13, 2018 14:50

ДУШАНБЕ, 13.02.2018 /АМИТ «Ховар»/.  Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар медиҳад, ки шумораи сокинони ноҳияи Ишкошим, ки аз гандум заҳролуд шудаанд, ба 34 нафар расид.

Ёдовар мешавем, ки 17 январи соли равон   5 нафар  сокинони ҷамоати  деҳоти Питупи ноҳияи Ишкошими  ВМКБ бо гумони заҳролуд шудан ба  Беморхонаи вилоятии клиникии шаҳри Хоруғ   интиқол дода шуда, фавран бистарӣ  карда шуданд.

Тавре аз Вазорати мазкур  иттилоъ доданд, баъд аз расидани ин маълумот як гурӯҳ  мутахассисони Вазорати тандурустӣ ба ҷои ҳодиса равон  карда шуданд. Аз ташхисҳо маълум гардид, ки сабаби заҳролуд шудани одамон гандуме будааст, ки аз ноҳияи Ҳамадонии вилояти Хатлон    ба ноҳияи Ишкошим овардаанд. Чунин навъи заҳролудшавиро дар илми тиб интоксикатсия меноманд.

Ба иттилои Вазорат, баъд аз  муоина ва ташхиси пурра  аз ҷониби мутахассисони  вилоятиву ҷумҳуриявӣ дар беморони бистаригардида ташхиси «Заҳролудшавӣ бо тухми гелиотроп. Гепатити гелиотропӣ», ки дар таркиби орд ёфт гардид,     муайян карда шуд.

«Дар натиҷаи андешидани тадбирҳои зарурии табобатӣ,  вазъи саломатии ду кӯдаки дар ҳолати вазнин қарордошта нисбатан мӯътадил гардид. Мутаассифона, новобаста аз табобати  таъйингардида, ҳолати яке аз кӯдакони дар бахши наҷот  бистарибуда, бемор Диноршо Қурбонбеков, соли таваллудаш  2009 ниҳоят вазнин гардида, ӯ 31 январи соли 2018 аз норасоии фаъолияти узвҳо фавтид»,- хабар дод манбаъ.

Тамоми нафарони алоқаманд ба қазияи мазкур, аз ҷумла, қариб 160 нафар, ки сокинони ноҳияи Ишкошим мебошанд, аз муоинаи табибон  ва ташхиси фаросавтӣ гузашта, намунаи хуни онҳо ҷиҳати анҷом додани ташхиси биокимиёвӣ гирифта шуд.

Ба иттилои манбаъ, дар айни ҳол дар Беморхонаи вилоятии клиникии шаҳри Хоруғ 12 нафар  кӯдакон ва 22 нафар калонсолон бистарӣ буда, ҷиҳати назорати пайвастаи беморон  аз ҳисоби мутахассисони соҳибтаҷриба  навбатдории иловагӣ роҳандозӣ шуда,  таъминот бо доруворӣ ва лавозимоти зарурӣ  ба роҳ монда шудааст.

Гурӯҳи кории иборат аз мутахассисони мақомоти дахлдор шурӯъ аз рӯзи якуми ҳодисаи мазкур дар муддати як ҳафта дар ҷамоатҳое, ки сокинони онҳо гандуми заҳролудгардидаро  харидорӣ кардаанд, аз ҷумла, дар деҳаҳои Питуп, Лангар, Вичкут ва Туғгози  ноҳияи Ишкошим  санҷишҳо анҷом дод.

Дар маҷмӯъ    4 ҳазору 440 кг гандуми дорои тухми гелиотроп ва 85 кг орди заҳролудгардида аз мардум бозпас гирифта шуда, бо тартиби муқарраргардида  нобуд карда шуданд.

 

 

Февраль 13, 2018 14:50

Хабарҳои дигари ин бахш

Дар Тошканд густариши ҳамкорӣ байни муассисаҳои таҳсилоти олии касбии Тоҷикистон ва Узбекистон баррасӣ шуд
«МегаФон Life»: маблағро тариқи паёмрасон интиқол диҳед!
Дар Бадахшон масъалаи таъмири роҳҳои дорои аҳамияти маҳаллӣ баррасӣ гардид
Дар Сарраёсати ҳифзи муҳити зист дар шаҳри Душанбе Маркази мониторинги камераҳои мушоҳидавӣ фаъол гардид
Имрӯз дар Тоҷикистон ҳаво тағйирёбанда шуда, борон ва раъду барқ пешгӯӣ мешавад
Дар ноҳияи Файзобод бо фаъолону собиқадорон ва ходимони дини деҳоти Чашмасор мулоқот доир гардид
Дар ду қисми низомии тобеи Вазорати корҳои дохилии Тоҷикистон дастархони идона ороста гардид
Дар ноҳияи Деваштич маъракаи кишти картошка оғоз шуд
Иҷлосияи нуздаҳуми Маҷлиси вакилони халқи вилояти Хатлон, даъвати шашум доир гардид
Дар пайравӣ ба амалҳои хайрхоҳонаи Президенти Тоҷикистон дар якчанд қисми ҳарбӣ дастурхони идона ороста шуд
Дар Неругоҳи барқи обии «Норак» ҷашни байналмилалии Наврӯз бо шаҳомати хосса таҷлил гардид
Имрӯз дар Тоҷикистон ҳаво тағйирёбанда шуда, борон ва раъду барқ пешгӯӣ мешавад