Ватан қаҳрамонони худро фаромӯш намекунад

Февраль 22, 2018 16:28

ДУШАНБЕ, 22.02.2018 /АМИТ «Ховар»/. Дар арафаи Рӯзи Артиши миллӣ бо фармони Асосгузори сулҳу ваҳдати миллӣ – Пешвои миллат, Сарфармондеҳи Олии Қувваҳои Мусаллаҳ, Президенти Ҷумҳурии Тоҷикистон муҳтарам Эмомалӣ Раҳмон ба полковник Хайриддин Аҳтамов барои ҷасорат ва мардонагӣ зимни ҳимояи сарҳади давлатӣ ордени «Спитамен, дараҷаи I» дода шуд.

Муовини якуми Раиси Кумитаи давлатии амнияти миллӣ, Фармондеҳи қӯшунҳои сарҳадии Кумитаи давлатии амнияти миллӣ генерал — полковник  Раҷабалӣ Раҳмоналӣ мукофоти баланди давлатиро дар ҳузури фарзандон, наздикон ва ҳамхизматони марҳум Хайриддин Аҳтамов  ба ҳамсари ӯ Гулнисо Нозимова аз номи Пешвои миллат тақдим намуда, зикр кард, ки роҳбарияти олии Тоҷикистон ва миллати бошарафи тоҷик ҳеҷ гоҳ фарзандони шуҷоъ ва қаҳрамони худро фаромӯш намекунад.

Мавриди зикр аст, ки чанд рӯз пеш бо ташаббуси фармондеҳии қӯшунҳои сарҳадии КДАМ манзили истиқоматии ҳамсар ва фарзандони полковник Хайриддин Аҳтамов пурра таъмир ва бо таҷҳизоти муосиру замонавӣ (рахти хоб барои кӯдакон, телевизиору қолин ва дигар ашёи рӯзгор) таъмин карда шуд. «Мо ҳеҷ гоҳ намегузорем, ки ҳамсар ва чор фарзанди ҳамяроқи мо Хайриддин Аҳтамов худро танҳо ҳис кунанд, зеро афсари тоҷик Хайриддин Аҳтамов барои таъмини амнияту осоиштагии сокнони мамлакат ҷони худро сипар кардааст. Ёди ӯ ва қаҳрамониҳои ӯ ҳамеша дар қалби мост», — гуфт полковник Бадриддин Мирзоев, муовини Фармондеҳи қушунҳои сарҳадии КДАМТ ҶТ оид ба корҳои сиёсӣ-тарбиявӣ.

Баъд аз маросими супоридани ордени «Спитамен, дараҷаи I», афсари қӯшунҳои сарҳадӣ Шуҳрат Раҳмонализода ҷасорату қаҳрамониҳо ва хизмати содиқонаи полковник Хайриддин Аҳтамовро ба  ёд овард. «Хайриддин Аҳтамов ҳамеша дар сафи пеши амалиёти машқиву ҷангӣ қарор дошт, ҳеҷ вақт намегузошт, ки аскарони қаторӣ дар сафи пеш бошанд, балки аввал худ пеш баромада, ба дигар афсарон намунаи олии ҷасуриву бебокӣ нишон медод. Дар баробари шуҷоату далерӣ хислатҳои олии инсонӣ дошт, хоксорӣ, фурутанӣ ва эҳтироми калонсолонро ба ҷо меовард», — зикр кард Ш.Раҳмонализода.

Хотиррасон мекунем, ки шоми 2 декабри соли гузашта дар дидбонгоҳи сарҳадии «Баҳорак»-и отряди сарҳадии «Шӯрообод» (ноҳияи Шамсиддини Шоҳин) гурӯҳи мусаллаҳи қочоқбарони афғон кӯшиш карданд, ки бо маводи мухаддир вориди Ҷумҳурии Тоҷикистон шаванд. Ҷинояткорони мусаллаҳи афғон ба огоҳии  сарҳадбонони тоҷик оид ба истодан итоат накарда, аз тамоми яроқҳои доштаашон ба тарафи сарҳадбонони тоҷик оташ кушоданд. Дар натиҷа, сардори отряд полковник Аҳтамов Хайриддин Талбакович зимни амалиёт қаҳрамонона ҳалок ва чор нафар сарҳадбонон захмдор шуданд. Аз оташи ҷавобии марзбонони тоҷик се нафар қочоқбари афғон безарар гардонида шуда, боқимонда бо истифода аз торикии шаб ба хоки Афғонистон паноҳ бурданд. Дар ҷои ҳодиса 4 автомати Калашников ва беш аз 33 килограмм маводи мухаддир дарёфт ва мусодира гардид.

Хайриддин Аҳтамов соли 1975 таваллуд шуда, баъди хатми мактаби миёна ба Донишгоҳи олии сарҳадии шаҳри Рязани Россия  дохил гардид ва онро соли 1997 хатм намуд.  Аз соли 1997 дар мақомоти интизомии мамлакат хизмати ҳарбиро шурӯъ намуда, то ба вазифаи сардори қисми низомӣ расида буд.

 

 

 

Февраль 22, 2018 16:28

Хабарҳои дигари ин бахш

Дар Тошканд густариши ҳамкорӣ байни муассисаҳои таҳсилоти олии касбии Тоҷикистон ва Узбекистон баррасӣ шуд
«МегаФон Life»: маблағро тариқи паёмрасон интиқол диҳед!
Дар Бадахшон масъалаи таъмири роҳҳои дорои аҳамияти маҳаллӣ баррасӣ гардид
Дар Сарраёсати ҳифзи муҳити зист дар шаҳри Душанбе Маркази мониторинги камераҳои мушоҳидавӣ фаъол гардид
Имрӯз дар Тоҷикистон ҳаво тағйирёбанда шуда, борон ва раъду барқ пешгӯӣ мешавад
Дар ноҳияи Файзобод бо фаъолону собиқадорон ва ходимони дини деҳоти Чашмасор мулоқот доир гардид
Дар ду қисми низомии тобеи Вазорати корҳои дохилии Тоҷикистон дастархони идона ороста гардид
Дар ноҳияи Деваштич маъракаи кишти картошка оғоз шуд
Иҷлосияи нуздаҳуми Маҷлиси вакилони халқи вилояти Хатлон, даъвати шашум доир гардид
Дар пайравӣ ба амалҳои хайрхоҳонаи Президенти Тоҷикистон дар якчанд қисми ҳарбӣ дастурхони идона ороста шуд
Дар Неругоҳи барқи обии «Норак» ҷашни байналмилалии Наврӯз бо шаҳомати хосса таҷлил гардид
Имрӯз дар Тоҷикистон ҳаво тағйирёбанда шуда, борон ва раъду барқ пешгӯӣ мешавад