Дар хиёбони Исмоили Сомонии шаҳри Душанбе «Маҷмааи об» бунёд мегардад

Июнь 15, 2019 12:06

ДУШАНБЕ, 15.06.2019. /АМИТ «Ховар»/. Мақомоти иҷроияи ҳокимияти давлатии шаҳри Душанбе  байни шахсони воқеӣ ва ҳуқуқии ватанӣ барои таҳияи  беҳтарин лоиҳаи «Маҷмааи об»  дар пойтахт аз 1 июн то 20 сентябри  соли 2019  озмуни кушод эълон менамояд. «Маҷмааи об»  дар хиёбони Исмоили Сомонии шаҳри Душанбе бунёд мегардад.  Дар ин бора қарори Раиси шаҳри Душанбе Рустами Эмомалӣ ба имзо расид.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар»  хабар доданд,   маҷмааи мазкур  бахшида ба  ташаббуси Тоҷикистон -«Даҳсолаи байналмилалии амал «Об барои рушди устувор», барои солҳои 2018-2028»  бунёд  мегардад. Тибқи иттилои манбаъ, озмун озод буда, дар як давр  сурат  мегирад. Барои ғолиби ҷои аввали озмун 30 ҳазор сомонӣ,  ҷойи дуюм 25 ҳазор ва ҷойи  сеюм 15 ҳазор сомонӣ  мукофот  муқаррар гардидааст.

Тибқи қарори дахлдори  Раиси шаҳр аъзои  Комиссияи озмун аз намояндагони мақомоти дахлдор, аз ҷумла  беҳтарин муҳаққиқони соҳаи меъморӣ ва Академияи илмҳои ҷумҳурӣ  иборат буда, раисии ин Комиссияро Рустами Эмомалӣ бар душ дорад.

Тибқи қарори мазкур Раиси шаҳр масъулинро вазифадор  намудааст, ки  озмуни кушодро дар муҳлати  муқарраршуда амалӣ гардонанд. Ҳамчунин аз Кумитаи меъморӣ ва сохтмони назди Ҳукумати Ҷумҳурии Тоҷикистон хоҳиш карда шудааст, ки  ҷиҳати ҷалби беҳтарин  меъморони ватанию хориҷӣ ба  озмуни мазкур  мусоидат намояд.

Ёдовар мешавем, ки ташаббус оид ба эълони Даҳсолаи нави байналмилалии амал «Об барои рушди устувор» бори нахуст аз ҷониби Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар рафти Форуми 7-уми ҷаҳонии об моҳи апрели соли 2015 дар Ҷумҳурии Корея пешниҳод гардид. Даҳсолаи байналмилаии амал «Об барои рушди устувор» аз 22 марти соли 2018 (Рӯзи байналмилалии об) оғоз гардида, 22 марти соли 2028 ба анҷом мерасад.

Хотиррасон менамоем, ки қаблан, соли 2003 бо ташаббуси Тоҷикистон соли оби тоза ва инчунин Маҷмаи Умумии СММ қатъномаеро қабул намуд, ки тибқи он давраи солҳои 2005 — 2015 ҳамчун Даҳсолаи байналмилалии амал «Об барои ҳаёт» эълон гардида буд. Баъдан, дар чаҳорчӯби даҳсолаи мазкур Маҷмаи Умумии СММ ташаббуси дигари Тоҷикистонро оид ба эълон намудани соли 2013 ҳамчун «Соли байналмилалии ҳамкорӣ дар соҳаи об» қабул намуд.

Июнь 15, 2019 12:06

Хабарҳои дигари ин бахш

«Ҷавонон – пайравони Пешвои миллат ва меросдори анъанаҳои наврӯзӣ». Дар Душанбе Фестивали чоруми дӯстии ҷавонон доир мешавад
«КАРНАВАЛИ НАВРӮЗӢ». Имрӯз дар Майдони Истиқлоли шаҳри Душанбе бахшида ба ҷашни байналмилалии Наврӯз барномаи фарҳангӣ доир мегардад
«Карнавали Наврӯзӣ» дар Майдони Истиқлоли шаҳри Душанбе 25 март баргузор мегардад
ХУШ ОМАДӢ, НАВРӮЗИ МАН! Дар Боғи фарҳангӣ-фароғатии ба номи Садриддин Айнӣ сокинону меҳмонон ҷашни Наврӯз таҷлил гардид
Аз ҷониби Раиси шаҳри Душанбе Рустами Эмомалӣ ба қишри ниёзманди ҷомеа ва сарбозони қисмҳои низомӣ кумак расонида шуд
ТАНТАНАҲОИ НАВРӮЗӢ. Имрӯз дар тамоми боғҳои пойтахт барномаҳои рангини фарҳангӣ баргузор мегарданд
Субҳи имрӯз дар «Боғи Ғалаба» сокинони чор ноҳияи пойтахт бо оростани гулхани ҷашнӣ фарорасии Соли нави аҷдодиро пешвоз гирифтанд
Дар шаҳри Душанбе Фестивали байналмилалии «Наврӯз-мероси фарҳангию ҷаҳонгардӣ» баргузор гардид
РАМЗИ БАҲОРУ НАВРӮЗ. Дар чор ноҳияи шаҳри Душанбе табақи суманак гузошта шуд
Дар Душанбе бо мақсади муаррифии имконияти сайёҳӣ ва фарҳанги миллии тоҷикон фестивали байналмилалӣ оғоз ёфт
«НАВРӮЗ-МЕРОСИ ФАРҲАНГИЮ ҶАҲОНГАРДӢ». Дар шаҳри Душанбе фестивали байналмилалӣ баргузор мегардад
ДУШАНБЕ-МАКОНИ БЕҲТАРИНИ САЙЁҲӢ. Дар айёми баҳор пойтахт барои гардишгарӣ хеле муносиб аст