Боздиди Президенти мамлакат Эмомалӣ Раҳмон аз намоиши маҳсулоти кишоварзии сокинони шаҳру ноҳияҳои вилояти Хатлон дар бозори Каёнуши ноҳияи Данғара

Май 29, 2020 08:30

ДУШАНБЕ, 29.05.2020 /АМИТ «Ховар»/. Дар идомаи сафари корӣ ба шаҳру ноҳияҳои вилояти Хатлон Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Данғара аз намоиши дастовардҳои хоҷагидорони шаҳру ноҳияҳои вилояти Хатлон дар бозори Каёнуш боздид ба амал оварданд. 

Ҳадаф аз намоиши маҳсулоти соҳаи кишоварзӣ муаррифии бештари дастовардҳои хоҷагиҳои кишоварзӣ ва бад-ин васила мусоидат ба таъмини амнияти озуқаворӣ мебошад.

Тибқи иттилоъ, хоҷагидорони 20 шаҳру ноҳияҳои вилояти Хатлон дар намоишгоҳ дастранҷи хешро ба миқдори 1 ҳазору 650 килограмм гӯшти гов ва маҳсулоти гӯштӣ, 10 ҳазор дона тухм, 6 ҳазор килограмм навъҳои гуногуни картошка, 4 ҳазору 550 килограмм ду навъи помидор, 6 ҳазору 250 килограмм ду навъи бодиринг, 5 ҳазору 950 килограмм карам, 1 ҳазору 400 килограмм меваи хушк ва дигар маҳсулоти соҳаи кишоварзӣ ба намоиш гузоштанд.

Дар заминаи татбиқи барномаҳои қабулнамудаи Ҳукумати Ҷумҳурии Тоҷикистон ва имтиёзҳои пешниҳодгардида имсол парандапарварони вилоят 24 миллиону 284 ҳазор дона тухм истеҳсол намудаанд, ки ин  нисбат ба соли гузашта зиёд аст.

Дар ноҳияи Данғара дар ду корхонаи парандапарварии Кооперативи тиҷоратии ба номи “Раҳмонҷон”, танҳо дар 4 моҳи соли равон зиёда аз 10 тонна гӯшт ва 1 миллиону 504 ҳазору 500 дона тухм истеҳсол карда шудааст.

Зимни боздид аз намоишгоҳ Сарвари давлат таъкид доштанд, ки вилояти Хатлон аз калонтарин вилоятҳои кишоварзии ҷумҳурӣ ба шумор меравад ва саҳми заҳматкашони он дар расидан ба яке аз ҳадафҳои стратегии давлат ва Ҳукумати Ҷумҳурии Тоҷикистон – таъмини амнияти озуқаворӣ арзандааст.

Пешвои миллат ба масъалаи истифодаи оқилонаи заминҳои корам ва ба гардиши кишоварзӣ ворид намудани заминҳои бекорхобида таваҷҷуҳи махсус доданд. Шаҳру ноҳияҳои вилояти Хатлон ва маҳз ноҳияи Данғара ҷиҳати истеҳсоли маҳсулоти босифати кишоварзӣ имкониятҳои бениҳоят зиёд дорад ва дар сурати ҳадафмандона истифода гардидани содироти маҳсулоти хушсифати ватанӣ ба бозорҳои дохил ва хориҷи мамлакат меафзояд.

Соли 2019 танҳо дар ноҳияи Данғара ба миқдори 4 ҳазору 794 тонна маҳсулоти кишоварзӣ истеҳсол гардид, ки аз ин шумора 500 тонна ба хориҷи мамлакат содирот карда шуд.

Ҳаҷми умумии истеҳсоли маҳсулоти кишоварзӣ дар ноҳия ба 1 майи соли ҷорӣ 72,7 миллион сомониро ташкил намуда, афзоиш нисбат ба ҳамин давраи соли гузашта 2,9 миллион сомонӣ зиёд гардидааст, ки 104 фоизро ташкил медиҳад.

Таъкид шуд, ки дар шаҳру ноҳияҳои вилояти Хатлон бо ворид намудани техникаву таҷҳизоти муосири соҳаи кишоварзӣ, тайи солҳои охир пешравиҳои зиёд ба назар мерасанд.

Истеҳсоли гӯшт дар ҳамаи бахшҳои хоҷагидории вилояти Хатлон дар заминаи иҷрои дастуру ҳидоятҳои Пешвои миллат муҳтарам Эмомалӣ Раҳмон дар самти таъмини сокинони мамлакат бо маҳсулоти хушсифати ватанӣ дар 4 моҳи соли равон ба 19 ҳазору 881 тонна расонида шуда, чорводорон 92 ҳазору 276 тонна шир истеҳсол намудаанд.

Дар намоишгоҳ намунаҳо аз маҳсулоти истеҳсолии деҳқонони вилоят, аз қабили гандум, ҷав, шолӣ, нахӯд, лубиё, мош, маъсар, офтобпараст, картошка, карам, бодиринг, помидор, лаблабу, сабзӣ, бехпиёз, сирпиёз, қаламфури булғорӣ, тухмии сабзавот, себ, нок, олу, гелос, зардолу, шафтолу ва қулфинай ба маъраз гузошта шуда буд.

Иттилоъ дода шуд, ки имсол кишоварзони вилоят дар 125,5 ҳазор гектар кишти баҳории ғалладонагиҳо гузаронда, аз ҳар як гектар ба ҳисоби миёна 55-сентнерӣ ҳосил гирифтанд. Айни ҳол дар тамоми хоҷагиҳо кишти такрорӣ бомаром идома дорад.

Тибқи дурнамо, дар ҳудуди вилоят дар беш аз 6 ҳазору 340 гектар картошка кишт шудааст. Нашъунамои он низ хуб буда, новобаста аз он ки ҳосилғундорӣ ҳанӯз ҳам идома дорад, деҳқонон умед доранд ҳосили фаровон мерӯёнанд.

Сарвари давлат муҳтарам Эмомалӣ Раҳмон хоҷагидоронро ба истифодаи самараноки замину гирифтани ҳосили дилхоҳ ҳидоят намуданд.

Таъкид шуд, ки вилояти Хатлон бо меваҳои шаҳдбораш на танҳо дар миқёси ҷумҳурӣ, балки берун аз он ҳам машҳур мебошад. Ҳамасола боғдорони вилоят ба Федератсияи Россия ва Ҷумҳурии Қазоқистон ҳазорҳо тонна меваи тару хушк содир менамоянд. Бо мақсади таъмини иҷрои «Барномаи рушди соҳаи боғу токпарварӣ дар Ҷумҳурии Тоҷикистон барои солҳои 2016 – 2020» дар вилояти Хатлон дар 1 ҳазору 223 гектар боғу токзори нав бунёд карда шуд, ки аз ин 180 гектараш боғҳои интенсивӣ мебошад.

Роҳбари давлат ба масъулони соҳа дастур доданд, ки ҳаҷми истеҳсоли маҳсулоти тайёр аз меваю сабзавотро барои содирот бештар намуда, шумораи корхонаҳои коркарди маҳсулоти кишоварзиро дар вилоят дучанд намоянд.

Мавриди зикр аст, ки  дар натиҷаи дастгириҳои пайвастаи давлату Ҳукумат ва фаъолияти ватандӯстонаи заҳматкашони вилоят имрӯз Хатлон ба яке аз минтақаҳои пешрафтаи кишоварзиву саноатии мамлакат табдил ёфта, саҳми корхонаву муассисаҳои он дар рушди иқтисодии ҷумҳурӣ ва фаровонии дастурхони мардум, аз ҷумла сокинони шаҳру ноҳияҳои ҷумҳурӣ торафт бештар мегардад.

Боздид аз намоиши маҳсулоти кишоварзии сокинони шаҳру ноҳияҳои вилояти Хатлон дар бозори Кушониёни ноҳияи Данғара 29.05.2020

Май 29, 2020 08:30

Хабарҳои дигари ин бахш

ЭЪЛОН: «ВАССОФИ ВАТАН». Барои рӯзноманигорон ва корбарони саҳифаҳои иҷтимоии шабакаҳои интернетӣ фестивал-озмун баргузор мешавад
Ҳангоми истифодаи хабару маводи сомона истинод ба www.khovar.tj ҳатмӣ аст!
Саҳифаҳои расмии АМИТ «Ховар» дар шабакаҳои иҷтимоӣ: facebook.com/niatkhovar, t.me/niatkhovar, youtube.com/@niat_Khovar_tj, instagram.com/niat_khovar/, twitter.com/niatkhovar, Радиои Ховар 101.5 fm, facebook.com/khovarfm/
Тандиси биринҷии чеҳраи Пешвои миллат ба Сарвари давлат Эмомалӣ Раҳмон тақдим гардид
Сарвари давлат Эмомалӣ Раҳмон дар шаҳри Душанбе дар ҳамоиши наврӯзӣ – «Корвони шодӣ» иштирок намуданд
Суханронии Пешвои миллат Эмомалӣ Раҳмон дар маросими баргузории карнавали наврӯзии «Корвони шодӣ» дар шаҳри Душанбе
Президенти Ҷумҳурии Тоҷикистон Эмомалӣ Раҳмон бо Президенти Федератсияи Русия суҳбати телефонӣ анҷом доданд
Президенти Ҷумҳурии Тоҷикистон Эмомалӣ Раҳмон ба Президенти Федератсияи Русия Владимир Путин барқияи изҳори тасаллӣ ирсол намуданд
Як қатор сарони давлатҳо ба унвони Президенти Ҷумҳурии Тоҷикистон Эмомалӣ Раҳмон ба муносибати ҷашни Наврӯзи байналмилалӣ барқияҳои табрикӣ ирсол намуданд
Масъалаи зиёд намудани сармоягузорӣ ба татбиқи Неругоҳи барқи обии «Роғун» баррасӣ гардид
Паёми шодбошии Пешвои миллат Эмомалӣ Раҳмон ба ифтихори Наврӯзи соли 2024
Президенти Ҷумҳурии Тоҷикистон Эмомалӣ Раҳмон бо Президенти Федератсияи Русия Владимир Путин суҳбати телефонӣ анҷом доданд