«ИНАШРО ҲАМ ПАСИ САР МЕКУНЕМ!». Чунин мегӯяд Раиси фраксияи ҲХДТ дар Маҷлиси намояндагони Тоҷикистон дар мавриди COVID-19

Май 1, 2020 18:56

ДУШАНБЕ, 01.05.2020. /АМИТ «Ховар»/. Чанд муддаст аст, ки саросари ҷаҳонро таҳдиди нав, яъне бемории сироятии коронавируси навъи нави COVID-19 фаро гирифтааст, ки тамоми кишварҳои ҷаҳон ва аҳолии саёраро ба хатари ҷиддӣ рӯ ба рӯ гардонидааст. Давлатҳои абарқудрати ҷаҳон низ аз олудашавӣ бо ин вабои аср эмин набуда, соҳаи тандурустии ҳамаи кишварҳо бо он дастбагиребонанд. Аммо дида истодаем, ки дар натиҷаи муборизаи салоҳиятноки илман асоснок афзоиши ин беморӣ дар бархе кишварҳо тамоюли пастшавиро касб карда, дар бархе кишварҳо муждаи пурра баркандани решаи ин вабо аллакай расида истодааст. Чунин мужда аз «зодгоҳ»-и ин вирус шаҳри Ухани Чин ҳам расид», — гуфт дар суҳбат бо АМИТ «Ховар» Раиси фраксияи Ҳизби Халқии Демократии Тоҷикитстон дар Маҷлиси намояндагони Маҷлиси Олии мамлакат Бахтовар САФАРЗОДА.  

Таваҷҷуҳ намоед ба идомаи суханони ӯ:

Ахиран ҷумҳурии азизи мо низ пас аз истодагарии тамом ва андешидани чораҳои пурзури пешгирӣ, мутаасифона бо ин вабо рӯ ба рӯ шуд. Бояд гуфт, ки дар пасманзаре, ки тамоми кишварҳо дар гирудори паҳншавӣ бо ин беморӣ азият мекашанд, сироятшавии аҳолии мо низ амри табиӣ ба ҳисоб меравад. Чунки рафтуомади бениҳоят зиёд миёни аҳолии мову бародаркишварҳо ҷой дорад, ки бешак эҳтимолияти паҳншавии бемориҳои сироятӣ, аз ҷумла Коронавирус дар чунин шароит ҷой дорад.

Таҷрибаи давлатҳои алоҳида нишон медиҳад, ки бо ин вирус муборизаи илман асоснок бурдан мумкин аст ва имрӯзҳо аллакай олимони соҳаи биология ва тиб таъкид бар он доранд, ки Коронавирус ба он ҳадде, ки муаррифиаш мекунанд, кушанда нест.

Барои пешгирӣ аз ин вирус Ҳукумати кишвар ва мақомоти дахлдор корҳои саривақтӣ ва чораҳои пешгириро карда истодааст. Умед ва боварии комил дорем, ки дар муддатҳои наздиктарин ин вабо паси сар мешавад.

Муҳим он аст, ки ба таҳлука наафтем, воҳима накунем. Таърих гувоҳ аст, ки вазниниҳои аз ин гаронро мардуми шарифи  тоҷик  бо сари баланд паси сар кардааст. Дар шароите, ки соҳаи тиб ба дастовардҳои беназир дар роҳи беҳдоштӣ мерасад, тандурустӣ ҳамчун як самти афзалиятноки соҳаи иҷтимоӣ эълон гардида, солимии миллатро ҳамчун боигарии давлат Пешвои муҳтарами миллат дар меҳвари сиёсати иҷтимоӣ қарор додаанд,  нест кардани ин вирус аз сарзамини биҳиштии мо фақат чанд кори оддиро аз ҳар яки мо талаб мекунад. Чанд кору амали оддӣ, аммо бениҳот муҳим. Ин риоя кардани тавсияҳои мутахассисон, яъне духтурони мо мебошад.

Агар мехоҳед ба ин «фариштаҳои сафедпӯш»-и ҳомии ҷону тани мо, ки  шабонарӯзӣ дар сафи аввали мубориза қарор доранд, кумак кунед, худ ва хонаводаи худро дар шароити тозагиву озодагӣ нигоҳ доред. Душмани асосии Коронавирус ин тозагӣ аст. Тозагие, ки дар вуҷуди мо, рагу шарёни мо, табиати мардуми тоҷик ҳаст. Ҳамзамон муваққатан даст кашидан аз чанд одате, ки боиси паҳншавии бемориҳои сироятӣ шуда метавонад. Боз замони самимона дастфишорӣ кардан, бӯсу канори ёру наздикон, оғӯшгирӣ, чойнӯшии якҷоя, нишастҳову чақ-чақи тоҷикона мерасад. Аммо ҳозир худдорӣ намоем.

Дар баробари ин барои баланд кардани масунияти худ ва хонавода аз меваю сабзавоти худии тару тоза, ки саросар витамину нерӯ мебошанд, истифода барем.

Бар замми ин, бояд таъкид намоем, ки наҳс худаш танҳо намеояд. Дар шароите, ки доду гирифт миёни кишварҳо ба ҳадди минималӣ расидааст, мо бояд аз пештара бештар дар фикри таъмини амнияти озуқаворӣ ва бо маҳсулоти худӣ таъмин кардани худамон шавем. Барои ин мавсими мусоиди кишту кори баҳорӣ, коркарди заминҳои наздиҳавлигӣ ва умуман ба таъбири Пешвои муҳтарами миллат, ки ибораи мардумӣ шудааст «ҳар як ваҷаби замин»-ро самаранок истифода барем.

Май 1, 2020 18:56

Хабарҳои дигари ин бахш

Президенти Тоҷикистон: «Ҷашни Наврӯз ва истиқлолу озодӣ – ин ду мафҳуми барои ҳар яки мо азизу муқаддас аст»
«КАЪБА ЧӢ МЕРАВӢ, ДИЛЕРО ДАРЁБ…». Андешаҳо дар ҳошияи мулоқоти Президенти Тоҷикистон бо фаъолону намояндагони ҷомеа ва ходимони дин
Пешвои миллат: «Боиси ифтихор аст, ки Наврӯз – калимаи асили тоҷикӣ, яъне «рӯзи нав» ҳоло барои миллионҳо аҳолии сайёра ҳамчун рӯзи ҷашни фархунда вирди забон аст»
Эмомалӣ Раҳмон: «Наврӯз аз ҷумлаи бузургтарин ва маҳбубтарин ҷашнҳои тоҷикон мебошад»
СИЁСИШАВИИ ДИН — ХАТАР БА ФАРҲАНГИ МИЛЛӢ ВА СУБОТИ ҶОМЕА. Андешаҳои профессор Нозим Маҳмадизода дар ин мавзуъ
Президенти Тоҷикистон: «Бо назардошти шароити замона анъанаи неки гузаштагон – сарфаю сариштакориро бояд риоя намоем»
Сулаймон Талбакзода: «Дарси хештаншиносӣ ва хизмат ба халқу Ватанро аз Пешвои миллат бояд омӯзем»
Президенти Тоҷикистон: «Мушкилоти таъмини аҳолии сайёра бо озуқаворӣ моро водор менамояд, ки ҳар қитъа заминро оқилонаву самаранок истифода барем»
Пешвои миллат Эмомалӣ Раҳмон: «Ойинҳои наврӯзӣ аҳли башарро ба таҳаммулгароӣ, бунёдкориву созандагӣ ҳидоят менамоянд»
Пешвои миллат: «Дар шароити кунунӣ зарур аст, ки ба кишти такрорӣ, гирифтани се – чор ҳосил аз заминҳои обӣ эътибори аввалиндараҷа дода шавад»
Наврӯз дар баробари забони тоҷикӣ бунёди худшиносии тоҷиконро низ ташаккул додааст
Пешвои миллат Эмомалӣ Раҳмон: «Мақому ҷойгоҳи Наврӯз он қадар баланд буд, ки ҳеҷ монеа ва қуввае онро натавонист аз байн барад»