Маросими ифтитоҳи шуъбаи нави байниноҳиявии АНМН дар Кӯлоб

Кӯлоб, 18.03.2016 (АМИТ «Ховар»).- Барои пурзӯр намудани мубориза бар зидди муомилоти ғайриқонунии маводи нашъаовар ва пешгирии кочоқи маводи мухаддир тавассути ноҳияҳои наздисарҳадӣ бо Ҷумҳурии Исломии Афғонистон ва мустаҳкам намудани ҳамкорӣ байни ду кишвар имрӯз дар шаҳри Кӯлоб маросими кушодашавии шуъбаи байни ноҳияв ии раёсати Агентии назорати маводи нашъаовари назди Президенти ҶТ дар вилояти Хатлон, ки бо тарҳи наву замонавӣ сохта шудааст, баргузор гардид. Дар он директори Агентии назорати маводи нашъаовари назди Президенти ҶТ Шерхон Салимзода, Сафири фавқулода ва мухтори Ҷумҳурии мардумии Чин дар Тоҷикистон Юе Бин, намояндаи расмии Вазорати амнияти ҷамъиятии Ҷумҳурии мардумии Чин, роҳбарони мақомоти ҳокимияти давлатии вилоятӣ ва маҳаллӣ, намояндагони мақомоти ҳифзи ҳуқуқ ва сохторҳои кудратии вилоят иштирок намуданд.
Бинои маъмурии шуъбаи байниноҳиявии агентӣ дар шаҳри Кӯлоб мутобиқи аҳднома байни Агентии назорати маводи нашъаовари назди Президенти ҶТ ва Вазорати амнияти ҷамъиятии Ҷумҳурии мардумии Чин оид ба расонидани кумаки ройгон ва таҷҳизоти полис таъмир гардида, ба истифода дода шуд. Бинои мазкур аз 3 ошёна, 11 утоқи корӣ, ҳаммом, ошхона, таваққуфгоҳи нақлиётӣ ва маҷмааи варзишӣ иборат мебошад.
Ҳамчунин аз тарафи намояндагии Ҷумҳурии мардумии Чин ба раёсати Агентии назорати маводи нашъаовари минтақаи Кӯлоб барои пурзӯр намудани хизмати софдилона ду нақлиёти хизматӣ такдим шуд.