Камол Насрулло: Наврӯз

Маънои ману намои ман Наврӯз аст!
Анвори раҳи раҳои ман Наврӯз аст!

Он махзани пур зи ганҷу симу зари ман,
Мероси ман аз ниёи ман Наврӯз аст!

Гар зинда ба сад ҳазор теғи захмам,
Дасти мададу давои ман Наврӯз аст!

Наврӯз! Биё, ки душманон дӯст шаванд,
Эҳсони Худо, сафои ман Наврӯз аст!

Равшангари роҳи мост нури Зардушт,
Тӯмори дилу зиёи ман Наврӯз аст!

Ман дар хати аҳд устуворам зи азал,
Зеро хати устувои ман Наврӯз аст!

Сад гуна сади садад куҷо садди ман аст,
То ҳафт осмон садои ман Наврӯз аст!

Аз вартаи марг мераҳонад моро,
Бемаргии ман, бақои ман Наврӯз аст!

 Ман зинда агар расидаам то имрӯз,
Донед, ки раҳнамои ман Нарӯз аст!

Чун сӯи Худо иботадаш меорам,
Иброи ман, ибтидои ман Наврӯз аст!

Боз омаданам ба асли аслам азалист.
Аз баъди Худо, Худои ман Наврӯз аст!

Камол Насрулло
Шоири халқии Тоҷикистон