Забони барномаҳои радиоиву телевизионӣ баррасӣ хоҳад шуд

Душанбе, 28.03.2016. (АМИТ «Ховар»). Вазъи иҷрои муқаррароти Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» дар шабакаҳо ва масъалаҳои забони барномаҳои радиову телевизион ва костагиҳо дар нутқи ровиёну барандагони барномаҳо, инчунин навиштаҷоти сатрҳои равон, эълону рекламаҳои шабакаҳо 29-уми март дар Шабакаи якуми телевизиони Тоҷикистон, МД телевизиони «Ҷаҳонамо», 30-юми март дар МД телевизиони «Сафина», МД «Телевизиони кӯдакону наврасон-«Баҳористон» ва 31-уми марти соли 2016 дар Радиои Тоҷикистон ва шабакаҳои он мавриди баррасӣ қарор хоҳанд гирифт.
Тавре ки масъули Хадамоти ВАО-и Кумитаи забон ва истилоҳоти назди Ҳукумати Ҷумҳурии Тоҷикистон Зулфониён Раҳим ба хабарнигори АМИТ «Ховар» хабар дод, ин иқдом аз ҷониби кумита дар иртибот ба вохӯрии Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки 1-уми марти соли 2016 бо кормандони Кумитаи телевизион ва радиои назди Ҳукумати Ҷумҳурии Тоҷикистон зимни ифтитоҳи шабакаҳои телевизионии «Варзиш», «Синамо» ва Академияи ВАО баргузор гардида буд, ба нақша гирифта шудааст.