Раъйпурсии умумихалқӣ баргузоргардида ҳисобида шуд

Душанбе, 23.05.2016 /АМИТ «Ховар»/. 22 маи соли 2016 санаи таърихиест, ки дар ин рӯз ифодаи олии иродаи халқи Тоҷикистон дар раъйпурсии умумихалқӣ оид ба ворид кардани тағйиру иловаҳо ба Конститутсияи (Сарқонуни) Ҷумҳурии Тоҷикистон баён гардид. Мардуми шарафманди тоҷик дар баргузории ин маъракаи муҳими сиёсӣ фаъолона ва озодона ширкат варзиданд.
Раиси Комиссияи марказии интихобот ва раъйпурсии Ҷумҳурии Тоҷикистон Бахтиёр Худоёрзода 23 май зимни эълони натиҷаҳои пешакии раъйпурсии умумихалқӣ иттилоъ дод, ки натиҷаи ҷамъбасти пешакӣ нишон дод, ки шумораи умумии раъйдиҳандагон 4 миллиону 409 ҳазору 516 нафар мебошанд. Шумораи шаҳрвандоне, ки дар раъйпурсӣ бевосита иштирок намуданд, 4 миллиону 38 ҳазору 183 нафар буда, он  92% теъдоди умумии раъйдиҳандагонро   ташкил медиҳад.
«Мутобиқи моддаи  31-уми Қонуни Конститутсионии  ҶТ «Дар бораи раъйпурсии ҶТ»  бо қарори комиссияи марказии интихобот ва раъйпурсӣ аз 23 майи  соли 2016 раъйпурсии умумихалқӣ оид ба ворид кардани тағйиру иловаҳо ба Конститутсияи (Сарқонуни) Ҷумҳурии Тоҷикистон  баргузоргардида ҳисобида шуд»,-илова намуд Б. Худоёрзода.  Аз ин шумора, ба ҷонибдорӣ аз ворид кардани тағйиру иловаҳо ба Конститутсияи (Сарқонуни) Ҷумҳурии Тоҷикистон 3 миллион 814 ҳазору 477 нафар раъй додаанд, ки ин рақам 94,5%-ро ташкил медиҳад. 3,3% раъйдиҳандагон ба муқобили ворид кардани тағйиру иловаҳо ба Конститутсия овоз додаанд.