Аъзои «Созандагони Ватан» китоби безаволи «Тоҷикон дар оинаи таърих» — ро меомӯзанд

Душанбе, 20.06.2016 /АМИТ «Ховар»/. Бо мақсади тарбияи ҳисси ватандӯстӣ дар ҷавонон ва ошно намудани онҳо бо таърихи пурғановати миллӣ, дар доираи ҳамоиши ҷумҳуриявии омӯзиши китоби Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон «Тоҷикон дар оинаи таърих» дар ноҳияи Бобоҷон Ғафуров бо аъзои намояндагии ТҶҶ «Созандагони Ватан» маҳфил баргузор шуд.
Дар даромадгоҳи толор намоиши китобҳои Президенти кишвар ба тамошо гузошта шуда, тавассути компютер суханронии Сарвари давлат намоиш дода шуд.
Роҳбари дастгоҳи кумитаи иҷроия М.Мирпочоева дар бораи аҳамияти таърихии китоб, саъю талош ва хизматҳои арзандаи Президенти кишвар бобати арҷгузории мутафаккирону алломаҳо, адибони классику муосир, таъриху фарҳанги бои тоҷикон, вусъати тоза бахшидан ба масъалаҳои омӯзиши китобҳои Сарвари давлат, таърихи Тоҷикистон, маҳалли зист, худшиносӣ ва ифтихори миллӣ сухан гуфт.
Мудири шуъбаи таблиғоту иттилооти Кумитаи иҷроияи вилоятӣ Фирдавс Ҳоҷиев дар бораи ҳамоиши ҷумҳуриявӣ маълумот дода, аҳли толорро ба мутолиаи китобҳои арзишнок, самаранок истифода бурдани вақти холӣ, баланд бардоштани савияи дониш, таҳлили саҳеҳи маводи сомона ва истифодаи дурусти он, қадр кардани меҳнати устодону омӯзгорон даъват намуд.