Корманди Маркази назорати давлатии санитарию эпидемиологии ноҳияи Восеъ бо гумони қаллобӣ дастгир шуд

Душанбе, 29.06.16. /АМИТ «Ховар»/. Аз ҷониби кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон (АНДМ ВА МК ҶТ) дар ноҳияи Восеи вилояти Хатлон қаллобон боздошт шуданд.
Тавре ки ба АМИТ «Ховар» аз маркази матбуоти агентии мазкур хабар доданд, аз тарафи кормандони АНДМ ВА МК ҶТ муайян карда шуд, ки корманди Маркази назорати давлатии санитарию эпидемиологии ноҳияи Восеъ Абдурасул Холматов бо маслиҳати пешакӣ бо корманди Беморхонаи марказии ноҳияи Восеъ Иброҳим Валиев ба боварии шаҳрванд «М» даромада, барои дохил намудан ба Коллеҷи тиббии ноҳияи Восеъ дар ду ҳолат аз шаҳрванд «М» маблағи 2100 доллари амрикоиро бо роҳи қаллобӣ гирифта, ягон амалро иҷро накарда, боз талаби маблағи 300 доллари амрикоиро доранд.
Дар натиҷаи гузаронидани чорабиниҳои фаврию ҷустуҷуӣ Иброҳим Валиев баъди аз шаҳрванд «М» гирифтани маблағи 300 доллари амрикоӣ дар ҳудуди Беморхонаи марказии ноҳияи Восеъ дастгир карда шуда, аз ӯ маблағи 300 доллари амрикоӣ ҳамчун далели шайъӣ ёфта гирифта шуд.
Оид ба ҳолати мазкур нисбат ба А. Холматов ва И. Валиев бо моддаи 247 қисми 4 банди «б» КҶ Ҷумҳурии Тоҷикистон парвандаи ҷиноятӣ оғоз карда шуда, тафтишот идома дорад.