Вусъати корҳои ободонӣ дар Ховалинг

Ховалинг,16.06.2016 /АМИТ «Ховар»/. Бахшида ба таҷлили ҷашни 25-солагии Истиқлолияти давлатии Ҷумҳурии Тоҷикистон дар шаҳру ноҳияҳои мамлакат корҳои ободонию созандагӣ идома доранд. Дар ҳамин замина дар маркази ноҳияи Ховалинг бо дастгирии Мақомоти иҷроияи ҳокимияти давлатӣ соҳибкорони маҳаллӣ бунёди боғи фарҳангию фароғатиро бо насби арғунчакҳои замонавӣ оғоз карда, то имрӯз 40 фоизи корҳои сохтмониро ба анҷом расонидаанд.
Тавре соҳибкор Ҷамшед Ҳабибуллоев иброз дошт, дар васли арғунчакҳо ва сохтмони боғи мазкур беш аз 20 нафар сокини маҳаллӣ ҷалб гардидаанд. Арғунчакҳоро мувофиқи нишондоди техникӣ устоҳои маҳаллӣ ҷо ба ҷо гузошта, насб мекунанд. Дар қисмати дигари боғ бунёди майдончаҳои варзишӣ низ ба нақша гирифта шудааст.
Ба гуфти соҳибкор қисмати аввали боғ дар рӯзи ҷашн ба истифода супорида мешавад. Баъди пурра ба истифода додани иншооти мазкур беш аз 40 нафар сокини маҳаллӣ соҳиби ҷои кори доимӣ мегарданд.