Бахшида ба 25-умин солгарди Истиқлолияти давлатӣ Варзишгоҳи марказии шаҳри Кӯлоб таъмиру азнавсозӣ гардида истодааст

Кӯлоб, 30.07.2016. /АМИТ «Ховар»/.  Дастаи футболи «Равшан»-и Кӯлоб дар нимаи дуюми чемпионати Тоҷикистон оид ба футбол бозиҳои хонагии худро дар майдони «Ҳосилот»-и Фархор мегузаронад.
Ин дар ҳолест, ки бахшида ба 25-умин солгарди Истиқлолияти давлатии Ҷумҳурии Тоҷикистон Варзишгоҳи марказии шаҳри Кӯлоб таъмиру азнавсозӣ гардида истодааст.  Дар айни замон корҳои азнавсозӣ дар ин варзишгоҳ бомаром идома дорад ва сохтмончиён умед доранд, ки таъмири варзишгоҳро пеш аз муҳлат ба анҷом расонанд.
Ба иттилои роҳбарияти клуби «Равшан»-и Кӯлоб барои мустаҳкам намудани ҳайати даста, айни замон ду нафар футболбозони собиқи «Равшан» Зариф Рустамов ва Бахтиёр Ҳасанов ҳамчунин Ҳимматулло Муллодӯстов аз дастаи «Барқчӣ» ба ҳайати даста даъват шудаанд ва онҳо умед доранд, ки натиҷаҳои ин дастаи овозадорро дар нимаи дуюми чемпионат боз ҳам баландтар мегардонанд.
Дар айни ҳол дастаи «Равшан»-и  Кӯлоб дар шаҳри Норак зери роҳбарии мураббиён ба тамринҳои давраи омӯзишӣ фаро гирифта шуда, барои нимаи дуюми мавсими имсола омодагӣ мегиранд.
Ба иттилои сармураббии даста Иззатҷон Исҳоқов, дар доираи омодагиҳо ба нимаи дуюми чемпионат дастаи «Равшан»-и Кӯлоб бо дастаи «Хайр»-и Ваҳдат як бозии дӯстона гузаронид, ки он бо ҳисоби 2:2 анҷом ёфт.