Дар Осорхонаи таъриху кишваршиносии «Авасто» гӯшаи «Асбобҳои миллии мусиқӣ» таъсис дода шуд

Душанбе, 23.07.2016. /АМИТ «Ховар»/. Дар толори Осорхонаи таъриху кишваршиносии вилояти Хатлон ба номи «Авасто» гӯшаи нави доимоамалкунанда ба номи «Асбобҳои миллии мусиқӣ» мавриди тамошои бинандагон қарор дода шуд.
Бинобар иттиллои сармуҳофизи фонди осорхона Сафармо Ятимова, дар гӯшаи мазкур асбобҳои миллии мусиқӣ, аз қабили сози миллӣ, рӯбоби бадахшонӣ, дутор, думбура, танбӯр, тори бадахшонӣ, таблак, най, доира, тори озарӣ, ғижак, сози миллӣ, зардеворӣ ва дигар намудҳои асбобҳои милии мусиқӣ, ки ба аввалҳои асри 20 мутааллиқанд, ҷамъоварӣ гардида, ба маърази тамошо гузошта шудаанд.
Маъмурияти осорхона бо мақсади таълим ва фаҳмондадиҳии роҳбаладон ва ходимони илмӣ оид ба гӯшаи навтаъсиси «Асбобҳои миллии мусиқӣ» Тағойназар Ҳайдаров, омӯзгори Мактаби санъати бачагонаи шаҳри Қӯрғонтеппа, мусиқишинос ва дорандаи унвони Аълочии фарҳанги Ҷумҳурии Тоҷикистонро даъват намуд, то оид ба ҳар як асбоби миллии мусиқӣ, ки дар гӯша овезон аст, маълумоти мухтасар диҳад
Мақсад аз таъсиси гӯшаи «Асбобҳои миллии мусиқӣ» дар осорхона, пеш аз ҳама, пос доштани арзишҳои миллӣ, ҳифз намудани асбобҳои миллии мусиқӣ ва ҷалби бештари тамошобинон мебошад.