Иттифоқи «Тоҷикматлубот»: ҳаҷми содирот рӯз то рӯз меафзояд

Душанбе, 21.07.16. /АМИТ «Ховар»/. «Дар шашмоҳаи аввали соли ҷорӣ ҳаҷми содирот ба хориҷи кишвар афзуда, дар маҷмӯъ 1640,2 тоннаро ташкил намуд, ки ин нишондод нисбат ба ҳамин давраи соли гузашта 549 тонна зиёд мебошад»,- зикр намуд муовини сардори раёсати Иттифоқи «Тоҷикматлубот» Хуршед Сангаков имрӯз зимни нишасти матбуотӣ.
Ӯ ҳамчунин иброз намуд, ки аз маҳсулоти содиротӣ асосан пиёз, зардолу ва гелос ба Ҷумҳуриҳои Қазоқистон,  Қирғизистон ва Ҷумҳурии Исломии Афғонистон содир карда шуданд. Пиёз аз шаҳру вилоятҳои Хатлон ва зардолуву гелос аз ноҳияи Ашт ҷамъоварӣ гардиданд.
«Дар айни ҳол нишондодҳои содирот ба дигар давлатҳо  назаррас аст ва «Тоҷикматлубот» барои ба роҳ мондани содироти ангур, лиму ва хушкмева омодагӣ гирифта истодааст»,-афзуд Х. Сангаков.