С. Қодирзода, сардори Хадамоти зидиинҳисорӣ: «Ба Тоҷикистон шакар асосан аз Ҳиндустон ва Покистон ворид мешавад

Душанбе, 29.07.2016. /АМИТ «Ховар»/. 56 %-и воридоти шакар ба  Тоҷикистон ба Покистон рост меояд. Дар раддабандии воридоти шакар ба Тоҷикистон кишвари дигари осиёӣ Ҳиндустон бо 20 % зинаи дуюм ва Озарбойҷон бо зиёда аз 14 %  воридоти шакар дар мақоми сеюм қарор доранд. Инчунин беш аз 9 %-и воридоти шакар ба Тоҷикистон  ба дигар давлатҳо марбут аст.
Саъдӣ Қодирзода, сардори Хадамоти зидиинҳисории назди Ҳукумати Ҷумҳурии Тоҷикистон мегӯяд, ки дар ин давра беш аз 40 субъекти хоҷагидор дар бозори воридоти шакар ширкат доштанд.
Ҳиссаи ширкатҳои «Шаҳром компания» дар воридоти шакар ба ҷумҳурӣ  56 %,   «Созандаи ватан» беш аз 7 %, «Азиз 555» 6 %-ро ташкил дода, 7 %-и шакари воридотӣ ба соҳибкори инфиродӣ  Абдулносир  Абдулзоҳир ва беш аз 22 % ба 37 субъекти  дигари хоҷагидор  рост меояд.
Бояд зикр намуд, ки  дар ин давра   нархи миёнаи фурӯши 1 кг  шакар дар бозорҳои кишвар 6, 40  то 7 сомониро ташкил дод.