Амалиёт дар Мосул: аз ДИ 800 километри мураббаъ ҳудуд гирифта шуд

Душанбе, 25.10.2016 /АМИТ «Ховар»/. Неруҳои амниятии Ироқ аз лаҳзаи оғози амалиёти озоднамоии Мосул наздики 800 километри мураббаъ ҳудудро аз ҷангиёни гурӯҳи террористии ба ном «Давлати исломӣ» (ДИ, мамнуъ дар Тоҷикистон) гирифтанд. Дар ин бора рӯзи душанбе намояндагони расмии Амрико зимни нишасти хабарӣ дар Пентагон иттилоъ доданд.
Бино ба арзёбии онҳо, амалиёти озоднамоии Мосул «оғози хуб» гирифт ва тибқи нақшаи қаблан тарҳрезишуда пеш меравад. Дар баробари ин таъкид мешавад, ки мушовирони низомии Амрико бо ҷониби Ироқ дар ҳамкории зич фаъолият доранд.
Ёдовар мешавем, ки амалиёти озоднамоии шаҳри Мосули Ироқ аз террористони ДИ шурӯъ аз 17 октябр идома дорад. Дар он низомиёни Ироқ, неруҳои маҳаллӣ, қувваҳои пешмаргаи курдӣ ва инчунин қувваҳои ҳарбӣ-ҳавоии эътилофи байналмилалӣ таҳти роҳбарии ИМА иштирок доранд.