Дар ноҳияи Спитамен зиёда аз 25 корхонаи саноатӣ фаъолият мекунад

Душанбе, 26.10.2016 /АМИТ «Ховар»/. Дар нуҳ моҳи соли равон ҳаҷми истеҳсоли маҳсулоти саноатӣ дар ноҳияи Спитамени вилояти Суғд ба 130 миллиону 643,3 ҳазор сомонӣ расида, суръати афзоиши он нисбат ба ҳамин давраи соли 2015-ум 1,5 баробар зиёд гардидааст.
Дар ин бора аз Хадамоти матбуоти раиси вилояти Суғд ба АМИТ «Ховар» хабар доданд.
Айни ҳол дар ноҳия 25 корхонаи саноатӣ мавҷуд буда, соли равон инчунин 5 корхонаи истеҳсолӣ таъсис дода шуд, ки истеҳсоли маҳсулот дар онҳо дар асоси коркарди ашёи хоми маҳаллӣ ба роҳ монда шудааст.
Дар ин давра дар соҳаи кишорварзӣ ба маблағи 323 миллиону 955 ҳазор сомонӣ маҳсулот истеҳсол намудаанд, ки нисбат ҳамин давраи соли гузашта 118,5 фоизро ташкил медиҳад.