Дар Шаҳристон беш аз 17 ҳазор тонна картошка истеҳсол шудааст

Душанбе, 12.10.12016./АМИТ «Ховар»/. Кишоварзони ноҳияи Шаҳристон соли 2016 дар 611 гектар картошка кишт намуда, айни ҳол ба ҷамъоварии ҳосил машғуланд. То ин муддат беш аз 17 ҳазор тонна картошкаи хушсифат ҷамъоварӣ карда шудааст. Имсол дурнамои истеҳсоли картошка дар ноҳия 18300 тонна мебошад.
Бино ба иттилои раёсати кишоварзии ноҳия, соли гузашта дар 605 гектар кишти картошка гузаронида шуда буд ва ҳосилнокии картошка имсол нисбат ба соли гузашта зиёд буда, аз 296 сентнери соли гузашта ба 304 сентнер расидааст.
Тавре аз Хадамоти матбуоти вилояти Суғд хабар доданд, дар солҳои охир, мувофиқи афзалиятҳои барномаи рушди соҳаи кишоварзӣ, хоҷагиҳои калонҳаҷми ноҳияи Шаҳристон аз нав таҷдид гардида, дар асоси он хоҷагиҳои хурди инфиродӣ ва оилавӣ таъсис ёфта истодаанд.
Дар ноҳия 12 адад кооперативи истеҳсолӣ, 2803 адад хоҷагии деҳқонии инфиродӣ ба қайд гирифта шудаанд.