«Қишлоқаки кӯдакӣ»-маҳфили шеъру суруд бо иштироки Бозор Собиру Гулрухсор бахшида ба Рӯзи забони давлатӣ

Душанбе, 04.10.2016. /АМИТ «Ховар»/. Субҳи имрӯз дар толори филармонияи халқии ба номи Нигина Рауповаи ноҳияи Файзобод бахшида ба Рӯзи забони давлатии Ҷумҳурии Тоҷикистон бо иштироки шоирони шинохтаи Ҷумҳурии Тоҷикистон Бозор Собир, Гулрухсор Сафиева, Раҳмат Назрӣ, овозхони маъруфи кишвар Муҳаррама Шарипова, роҳбарони мақомоти ҳифзи ҳуқуқ, кормандони ташкилоту муассисаҳо ва собиқадорон маҳфили шеъру суруд таҳти унвони «Қишлоқаки кӯдакӣ» баргузор гардид. Дар маҳфили шеъру суруд сарояндаи шинохта Ҳабибуллои Мирзошариф аз ашъори Бозор Собир, Гулрухсор Сафиева ва Раҳмат Назрӣ сурудҳои тозаэҷод сароид.
Ҳамчунин дар маҳфили фарҳангӣ шоирони шинохтаи ҷумҳурӣ сокинони ноҳияро бо Рӯзи забони давлатӣ табрик намуда, дар васфи забону посдории он, дӯст доштани Ватану миллат, эҳтирому арҷгузорӣ ба хизматҳои бузурги Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва барои сарҷамъии миллати тоҷику оромии кишвар сухан карданд.