Маълумотнома дар бораи соҳаҳои истеҳсолот, нақлиёт ва алоқаи кишвар ба нашр расид

Душанбе, 17.10.2016 /АМИТ «Ховар»/. Маърӯзаи «Вазъи иҷтимоию иқтисодии Ҷумҳурии Тоҷикистон» барои моҳҳои январ-сентябри соли 2016 аз чоп баромад.
Нашрияи ҳармоҳаи Агентии омори назди Президенти Ҷумҳурии Тоҷикистон маҷмӯи иттилооти таъҷилиро оид ба вазъи иҷтимоию иқтисодии мамлакат, субъектҳои Ҷумҳурии Тоҷикистон, соҳаҳо ва бахшҳои иқтисодӣ барои моҳи охири ҳисобот ва аз аввали сол дар бар мегирад.
Тавре ки аз Агентии омор иттилоъ доданд, дар нишондиҳандаҳои асосии иҷтимоию иқтисодӣ тавозун аз рӯи моҳҳои соли равон ва гузашта оварда мешавад. Агентии омор гузоришро дар асоси маълумоти вазорату идораҳои Ҷумҳурии Тоҷикистон таҳия менамояд.
Дар гузориш оид ба соҳаҳои муҳимтарини истеҳсолот, нақлиёт ва алоқа, робитаҳои иқтисодии хориҷӣ, бозори истеъмолӣ, нарх, молия, бозори меҳнат ва сатҳи зиндагии аҳолӣ маълумоти васеъ пешниҳод карда мешавад.