Нозирони навраси ҳаракати Тоҷикистон дар Озмуни байналмилалӣ иштирок мекунанд

Душанбе, 17.10.2016. /АМИТ «Ховар»/. Дар шаҳри Анапаи Федератсияи Русия аз 11 то 24 октябри соли равон Озмуни XI байналмилалии «Нозирони навраси ҳаракат дар роҳ» баргузор мегардад.
Дар озмун дастаҳои нозирони навраси ҳаракат дар роҳ (ННҲ) аз ҷумҳуриҳои Тоҷикистон, Беларус, Қирғизистон, Қазоқистон, Озарбойҷон, Федератсияи Русия ва 26 дастаи нозирони навраси ҳаракат дар роҳи субъектҳои Федератсияи Русия ширкат меварзанд.
Ҷумҳурии Тоҷикистонро аъзои дастаи нозирони навраси ҳаракат дар роҳи литсейи №2 барои хонандагони болаёқати шаҳри Душанбе муаррифӣ менамоянд.
Тавре баргузоркунандагони озмун хабар доданд, иштирокчиён дар ҷараёни озмун бояд кӯшишу маҳорати худро оид ба донистани қоидаҳои ҳаракат дар роҳ, расонидани ёрии аввалини тиббӣ ва маҳорати рондани велосипед аз монеаҳо нишон диҳанд.