Баргузории ҷаласаи шашуми Комиссияи муштараки Тоҷикистону Австрия дар Вена

Душанбе, 11.11.2016 /АМИТ «Ховар»/. Дар шаҳри Вена ҷаласаи шашуми Комиссияи муштарак оид ба ҳамкории иқтисодии дуҷониба миёни Тоҷикистону Австрия бо роҳбарии ҳамраисони он- муовини аввали Вазири рушди иқтисод ва савдои Ҷумҳурии Тоҷикистон Назризода Саидраҳмон ва муовини Вазири федералии илм, тадқиқот ва иқтисоди Австрия хонум Бернадетт Марианне Гирлингенр 9 ноябр баргузор гардид. Дар ин бора аз Вазорати корҳои хориҷии Ҷумҳурии Тоҷикистон хабар доданд.
Намояндагони вазорату идораҳои Тоҷикистону Австрия, масъулони соҳаҳои энергетика, иқтисод, савдо, саноат, тандурустӣ ва сайёҳӣ дар кори ҷаласа иштирок намуданд.
Ҷонибҳо масъалаҳои муҳими муносибатҳои дуҷониба, аз ҷумла ҳолат ва дурнамои ҳамкории тиҷоратию иқтисодӣ, тавсеаи минбаъдаи пояи ҳуқуқию шартномавӣ, рушди ҳамкорӣ дар соҳаи энергетика, тандурустӣ, саноат ва дигар бахшҳои мавриди таваҷҷуҳро баррасӣ намуданд.
Дар фароварди ҷаласа Протоколи ҷаласаи комиссия ба имзо расид.
Ҳамчунин 10 ноябри соли 2016 дар Палатаи федералии иқтисодии Австрия Форуми иқтисодии Тоҷикистону Австрия таҳти унвони «Иқтидори иқтисодӣ ва сармоягузории Тоҷикистон» баргузор гардид.
Дар ҳошияи Форуми иқтисодӣ доираи васеи соҳибкорони тоҷику австриягӣ, намояндагони ширкатҳо ва масъулини ниҳодҳои мухталифи ҳарду кишвар ширкат доштанд.
Баъд аз ҷамъбасти қисми расмии ҳамоиш миёни доираҳои соҳибкорон, тоҷирон, намояндагони ниҳодҳои гуногуни Тоҷикистону Австрия гуфтугӯҳои дуҷониба сурат гирифтанд.