Кароматулло Қурбонов агар зинда мебуд, 55-сола мешуд…

Душанбе, 29.11.2016, /АМИТ «Ховар»/. Сароянда ва бастакори боистеъдоди тоҷик Кароматулло Қурбонов 55 сол қабл аз ин, 29 ноябри соли 1961 чашм ба дунё кушодааст. Хатмкардаи Донишкадаи санъати шаҳри Душанбе ба номи Мирзо Турсунзода (соли 1982) буда, ҳанӯз аз айёми мактабхониву донишҷӯӣ рӯи саҳна баромадааст. Баъд аз хатми Донишкадаи санъати шаҳри Душанбе бинобар истеъдоди фитрӣ ва садои хуш доштанаш ба ансамбли эстрадии машҳури замон «Гулшан» пазируфта шуд.
Минбаъд дастаи ҳунарии «Гулшан» ба мактаби сайқали маҳорату рушди истеъдоди Кароматулло Қурбонов мубаддал мегардад. Шуҳрати пуровозаи ин ҳунарманди соҳибистеъдоди тоҷик берун аз Тоҷикистон, то ба ҷумҳуриҳои ҳамсоя ва кишварҳои шарқи он замон афсонавӣ доман паҳн карда буд.
Ба Кароматулло Қурбонов умри кӯтоҳ, ҳамагӣ 31 сол насиб карда буд. Бо вуҷуди умри кӯтоҳ бо садои Кароматулло Қурбонов 76 суруд сабт шудааст, ки ҳар яке бо оҳанги хосу самимияту муҳаббат сароида шудаанд.
Таронаҳои «Ту ҳам ёде бикун аз ман», «Эй подшаҳи хубон», «Бо дили дарё нишинам», «Бишнав, ки аз бунёди ман», «Ай духтаре, ки чашми ту дарёи розҳост», «Овора», «Ту ҳам ёде бикун аз ман», «Махмури ҷоми ишқам», «Зиндагӣ», «Хазонрез» ва охирин суруди ӯ «Хайрбод» то ҳоло ҳам оҳанг, бадеияту ҷаззобият ва дилнишинии худро гум накардаанд. Балки ҳамеша чун гулҳои хушнакҳату ботароват номи ин ҳунарманди нотакрорро зинда нигоҳ медоранд.