«Мубориза бо коррупсия кори ҳамагон аст»-бардошт аз мулоқот дар Вазорати фарҳанг

Душанбе, 11.11.2016 /АМИТ «Ховар»/. Дирӯз дар Вазорати фарҳанги Ҷумҳурии Тоҷикистон дар доираи барномаи ҷумҳуриявии «Стратегияи муқовимат бо коррупсия дар Ҷумҳурии Тоҷикистон барои солҳои 2013-2020» вохӯрии намояндагони Агентии назорати давлатии молиявӣ ва мубориза бо коррупсияи Ҷумҳурии Тоҷикистон бо роҳбарону кормандони муассисаҳои зерсохтор ва раёсату шуъбаҳои Вазорати фарҳанги ҷумҳурӣ баргузор гардид.
Тавре аз вазорат хабар доданд, дар вохӯрӣ сардори раёсати дуюми Сарраёсати пешгирии коррупсияи Агентии мазкур Нигора Муқимӣ оид ба вазъи коррупсия дар Тоҷикистон маълумот дода, гуфт: «кормандони соҳаи фарҳанг, ки бо аҳолӣ муносибати наздик доранд ва аз ҳаёти рӯзмарраи аҳолӣ бохабаранд, бояд барои баланд бардоштани фарҳанги зиддикоррупсионии мардум кӯшиш намоянд. Мубориза бо коррупсия масъулияти танҳо як сохтори алоҳида нест, балки масъулияти тамоми роҳбарони идораву муассисаҳо, масъулияти ҳар як фарди кишвар аст».
Сипас вазири фарҳанги Тоҷикистон Шамсиддин Орумбекзода изҳор дошт, ки: «метавон бо ду воситаи пуртаъсир- нашрияҳо ва саҳнаҳои театрию консертӣ, ки аудиторияи бузургро доро ҳастанд, фазои оштинопазир бо ришваситониро фароҳам овард».
Дар охир таъкид карда шуд, ки гирифтани пеши роҳи ин падида вазифаи ҳамагон аст.