Мулоқоти сафири Тоҷикистон дар Арабистони Саудӣ бо раиси нави Бонки исломии рушд

Душанбе, 11.11.2016. /АМИТ «Ховар»/. Сафири фавқулода ва мухтори Ҷумҳурии Тоҷикистон дар Шоҳигарии Арабистони Саудӣ Заробиддин Қосимӣ бо Раиси Бонки исломии рушд доктор Бандар Муҳаммад Алҳаҷҷор мулоқот намуд. Дар ин бора ба АМИТ «Ховар» аз сафорати Тоҷикистон дар Арабистони Саудӣ иттилоъ доданд.
«Дар оғози вохӯрӣ дипломати тоҷик ба раиси нави бонк паёму дуруд ва табрикоту таманниёти неки Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро ба муносибати таъйин шудани ӯ ба ин мақоми пурмасъулият расонид», — гуфта мешавад дар хабарномаи сафорат.
Дар он ҳамчунин омадааст, ки «бо арзи сипос аз ҳамкории босамари бисёрсолаи дуҷониба изҳори бовар карда шуд, ки Бонки исломии рушд минбаъд низ ба рушди босуботи Тоҷикистон тавассути маблағгузории лоиҳаҳои зербиноӣ ва иҷтимоӣ мусоидати фаъол хоҳад дошт».
«Дар посух ба даъват барои ташриф ба Тоҷикистон Бандар Алҳаҷҷор таъкид дошт, ки баҳри шиносоӣ бо рафти татбиқи лоиҳаҳои бонк ва оғози маблағгузориҳои нав ояндаи наздик аз Тоҷикистон дидан хоҳад кард», — зикр шудааст дар иттилоия.