Ҳадафи ҳамоиш-ҳимояи арзишҳову манфиатҳои миллӣ ва ба ҳам овардани олимони ҷавон

ДУШАНБЕ, 21.12.2016 /АМИТ «Ховар»/. Дар Донишкадаи молия ва иқтисоди Тоҷикистон дар мавзӯи «Ҷавонон, манфиатҳои миллӣ, истиқлолият ва ягонагӣ» ҷамъомад баргузор гардид.
Ба иттилои Донишкадаи молия ва иқтисоди Тоҷикистон, ҳадаф аз баргузории ҳамоиш ҳимояи арзишҳову манфиатҳои миллӣ, ташаккули ҳисси худшиносиву худогоҳии ҷавонон, баланд бардоштани маърифати зеҳнии онҳо ва ба ҳам овардани олимони ҷавонон мебошад.
«Дар ҳамоиш беш аз 15 маърӯза оид ба мавзӯъҳои сиёсиву иқтисодӣ, фарҳангиву маданӣ ва масоили марбут ба манфиатҳои миллӣ, арзишҳои соҳибистиқлолии кишвар баррасӣ шуданд.
Ҳамоиш бо ибтикори бахши ҷавонон, варзиш ва сайёҳии ноҳияи Сино ташкил гардида, дар он беш аз 60 нафар ҷавонон, аз ҷумла олимони ҷавоне, ки дар самти ҷомеашиносӣ корҳои илмӣ анҷом медиҳанд, иштирок намуданд»,-хабар дод манбаъ.