Бахшида ба Рӯзи байналмилалии маъюбон дар шаҳри Панҷакент ҳамоиш доир гардид

Душанбе, 03.12.2016. /АМИТ «Ховар»/. Бахшида ба Рӯзи байналмилалии маъюбон, ки ҳамасола 3 декабр таҷлил мешавад, дар шаҳри Панҷакент ҳамоиш доир гардид. Дар ин бора аз мақомоти иҷроияи ҳокимияти давлатии шаҳри Панҷакент хабар доданд.
«Дар ҷамъомад оид ба мушкилоти кӯдакони маъюб, фарогирии онҳо ба мактабҳо, ҷалби омма барои ба ҷамъият ворид намудани ин қишри ҷомеа сухан рафт. Зикр карда шуд, ки бо дастгирии Ҳукумати кишвар ва фаъолияти назарраси ташкилотҳои ҷамъиятие, ки бевосита бо маъюбон сару кор доранд, имрӯз фарогирии атфоли маълул ба таҳсилот бештар гардида, таваҷҷуҳи ҷомеа барои ҳалли мушкилоти эшон афзудааст»,- иттилоъ дод манбаъ.
Дар ҷамъомад, ки бо ташаббуси ҳукумати шаҳри Панҷакент баргузор шуд, намояндагони ташкилоти байналхалқии «Миссияи Шарқ», ташкилоти ҷамъиятӣ, намояндагони шуъбаи маорифу тандурустӣ, ҳифзи ҳуқуқи кӯдак ва фаъолони деҳаҳо ширкат намуданд.