Дар вилояти Суғд соли равон ду «шаҳри саноатии миллиардер» ба қайд гирифта шуд

Хуҷанд. 05.11.2016 /АМИТ «Ховар»/. «Соли равон дар миқёси вилоят ду шаҳр ҳамчун «шаҳри саноатии миллиардер» ба қайд гирифта шуданд. Инҳо шаҳри Гулистон, ки аз ҷониби коргоҳҳои саноатии он дар давоми 11 моҳ ба маблағи 1,9 млрд ва шаҳри Панҷакент, ки ба андозаи 1,1 млрд сомонӣ маҳсулоти саноатӣ истеҳсол шудааст, мебошанд». Ин маълумотро ба хабарнигори минтақавии АМИТ «Ховар» мудири шуъбаи энергетика ва саноати мақомоти иҷроияи ҳокимияти давлатии вилояти Суғд Озифхон Шарифзода дастрас кард.
Ба иттилои манбаъ, дар 11 моҳи соли равон ба саноатчиёни вилояти Суғд муяссар гардид, ки истеҳсоли маҳсулоти саноатиро ба 6,2 млрд. сомонӣ расонанд. Ин нишондиҳанда нисбат ба ҳамин давраи соли қаблӣ 2 млрд сомонӣ зиёд буда, бо нархҳои амалкунанда ба 147,5 фоиз ва бо назардошти индекси нархҳо ба 139,1 фоиз баробар мебошад.
«Раиси вилояти Суғд Абдураҳмон Қодирӣ ба саноатчиёни вилоят дастур дод, ки дар миқёси вилоят то якуми январи соли 2017 ҳаҷми маҳсулоти саноатиро нисбат ба якуми январи соли 2014, яъне дар давоми 3 сол 2 маротиба афзоиш диҳанд. Саноатчиёни вилоят бо истифода аз захираҳои мавҷуда истеҳсоли маҳсулоти саноатиро то якуми декабри соли равон нисбат ба соли 2014- 2,1 маротиба афзоиш доданд»,-афзуд О. Шарифзода.