Донишҷӯён бояд дар пешгирии амалҳои коррупсионӣ саҳм гузоранд

Душанбе, 05.12.2016 /АМИТ «Ховар»/. «Даст задан ба амалҳои ришваситонӣ хиёнат ба вазифа ва халқу Ватан аст. Аз ин рӯ, бояд барои пешгирӣ ва мубориза бо он дастаҷамъона мубориза барем»,-зикр шуд дар мулоқоти кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон бо устодону донишҷӯёни Донишгоҳи миллии Тоҷикистон.
Дар ин бора аз Донишгоҳи миллии Тоҷикистон хабар доданд.
Ба иттилои манбаъ, дар ҳамоиш, ки бештари иштирокдоронро донишҷӯёни факултаи молиявию иқтисодии донишгоҳ ташкил медоданд, изҳор гардид, ки донишҷӯён бояд аз амалҳои коррупсионӣ бохабар бошанд ва дар пешгирии чунин рафторҳо саҳм гузоранд.
«Беҳтарин воситаи пешгирии амалҳои коррупсионӣ- ин баргузории мулоқоту суҳбатҳо ва бештар намудани корҳои фаҳмондадиҳӣ бо шаҳрвандон, бахусус бо донишҷӯён мебошад,-иброз доштанд масъулин.
Ташаббускорони ҳамоиш изҳор карданд, ки мулоқот дар доираи «Стратегияи миллии муқовимат бар зидди коррупсия барои солҳои 2013-2020» роҳандозӣ гардидааст.