«Най чаро менолад»-и Раҷабалӣ Қудратов ғолиби озмуни эҷодии Пажӯҳишгоҳи маданияти Ҷумҳурии Корея шуд

ДУШАНБЕ, 23.12.2016. /АМИТ «Ховар»/. Асари адиби тоҷик Раҷабалӣ Қудратов бо номи «Най чаро менолад» ғолиби озмуни Пажӯҳишгоҳи маданияти Ҷумҳурии Корея гардид. Ин озмун ҳамасола бо мақсади дарёфти беҳтарин ҳикояву афсона барои хонандагони хурдсол дар байни аҳли қалами Осиёи Марказӣ гузаронида мешавад. Дар ин бора аз Вазорати фарҳанги Ҷумҳурии Тоҷикистон иттилоъ доданд.
«Дар озмуни имсола асари адиби тоҷик Раҷабалӣ Қудратов бо номи «Най чаро менолад» ғолиб гардид ва он дар шакли китоби алоҳида ба забонҳои кореягӣ ва русӣ ба табъ расид. Ин асарро рассоми моҳир Ким Сонхи оро додааст»,-хабар дод манбаъ.
Ёдовар бояд шуд, ки чанде пеш ғолибони озмуни имсола ба «Фестивали афсонаҳои Осиё-2016» даъват шуданд ва он дар шаҳри Кванджуи Корея доир гашт. Дар доираи ин барнома миёни адибони Осиёи Марказӣ ва дӯстони кореягӣ мубодилаи афкори эҷодӣ сурат гирифт.