Ноҳияи Бобоҷон Ғафуров: Захираи 900 тонна ангур ва 450 тонна себ барои фасли зимистон

Б. ҒАФУРОВ, 10.12.2016 /АМИТ «Ховар»/. Дар ноҳияи Бобоҷон Ғафуров дар 8 сардхона ангур, себ, хурмо, полезиҳо ва дигар масолеҳи кишоварзӣ бо мақсади таъмин кардани бозор ва нигоҳ доштани нархи маҳсулот дар давраи зимистон ва аввали баҳор захира карда шудаанд. Сардхонаҳои мазкур асосан барои захираи ангуру мева пешбинӣ шуда, ба соҳибкорони инфиродӣ тааллуқ доранд. Алҳол захираи ангури «тоифӣ» ва дигар навъҳои ангур ба 900 тонна расонида шудааст.
Ба сардхонаҳои ноҳияи Бобоҷон Ғафуров беш аз 300 тонна себ аз боғҳои шаҳру ноҳияҳои Панҷакент, Истаравшан, Шаҳристон, Ашт харидорӣ шуда, дар сардхонаи «Баҳор» нигоҳдорӣ мешавад.
Дар сардхонаи соҳибкори инфиродӣ Саҳобиддин Иброҳимов дар шаҳри Гулистон 100 тонна себ ва 50 тонна биҳӣ нигоҳ дошта мешаванд.
Дар масоҳати боқимондаи сардхонаҳои ноҳия захираи сабзавот, аз ҷумлаи сабзӣ, турбу шалғам, карам аз ҳосили кишти такрорӣ ба роҳ монда шудааст.